Maraming plano ang TV5 sa taong 2012 para kay Nora Aunor, ayon mismo sa Superstar at sa kanyang personal manager na si Boy Palma.
Bukod daw sa dalawang malaking pelikula na gagawin ni Ate Guy para sa Studio 5 (Cinemabuhay), tiyak din ang pagkakaroon ng aktres ng isang musical-variety show sa Kapatid network.
Pero ang tungkol dito'y nananangan muna sa magiging resulta ng pagpapaopera ni Nora ng kanyang vocal chords sa Boston sa January 2012.
Walang nababanggit na "what if" si Ate Guy tungkol sa naturang prospect. Positibo ang isipan niya hinggil sa tunguhin.
"May awa po ang Diyos," sabi niya sa PEP.ph (Philippine Entertainment Portal).
"Pag nagkaroon ako ng boses, oo naman...tuloy 'yan [paghu-host ng TV musical show]."
Maraming fans ni Nora ang laging nag-aabang ng mga bagong balita hinggil sa mga susunod na proyekto ng kanilang idolong singer at aktres, kaya inusisa pa rin ng PEP ang mga posibilidad.
Ano kaya ang magiging format ng kanyang show—isang straight musical na may live bands, tulad ng Superstar...Beyond Time noong mid-'90s, o isang musical-variety, ala-Superstar noong '70s at '80s?
"Hindi ko pa matiyak. Mapag-uusapan ang tungkol diyan," sagot ni Ate Guy.
Gusto din ni Nora na muling makasama si German Moreno sa musical show.
Si Kuya Germs ang dati niyang co-host sa Superstar.
"Oo naman. Kung papayag si Kuya Germs [na lalabas siya sa TV5]," nakangiting wika rin ni Nora.
Identified sa GMA-7 ang veteran TV host.
JOHN RENDEZ'S RECORDING COMEBACK. Nang bisitahin namin si Nora sa kanyang bagong condo unit ay nandoon din ang comedian at rap artist na si Andrew E.
Pinag-uusapan naman ni Andrew at ng rap artist-friend ni Ate Guy na si John Rendez ang bagong recording na gagawin ni John, under Dongalo Wreckords na pag-aari ni Andrew.
Guy is supporting John's recording comeback, although she said it's John's turf, as he is the rapper-composer.
"Siya lahat ang dumidiskarte. Manager niya lang ako," pabirong sabi ni Ate Guy.
Napakinggan ng writer na ito, sa pamamagitan ng computer laptop, ang isang komposisyon na inareglo ni John na kasama sa bagong album.
Kapwa impressed sina Guy at Andrew sa komposisyon.
"Kailangan lang talaga ng suporta," banggit uli ng Superstar about Rendez.
INDIE PROJECT PROPOSALS FOR NORA. Samantala, bukod sa mga pelikulang gagawin ng Studio 5, na masusing pinag-aaralan ng creative team ng Kapatid network, mayroong go-signal ang istasyon kay Nora hinggil sa paglabas niya sa mga independent o indie productions.
Kailangan lang ang approval ng TV5 management sa anumang project proposal, dahil exclusive contract star si Nora ng Kapatid network.
Tungkol dito, hiningi namin ang komento ni Ate Guy tungkol sa nabalitaan ng PEP na umano'y marami siyang indie project proposals; o kaya siya ang hinihinging aktres na gumanap ng indie directors.
Pero tila nahihirapang mag-pitch ang mga direktor dahil karamihan ng mga kuwento o role na ini-o-offer ay hindi na raw bago.
At na-te-turn down umano ang mga 'yon dahil nagawa na ni Nora ang iniaalok na kuwento o papel.
"Hindi naman," pagsalungat ni Ate Guy.
"Kasi, hindi lang ako ang babasa [ng script] pag may nai-submit.
"Aaprubahan pa talaga ng TV5. Kailangan mabasa din talaga nila."
As an example, Nora cited a particular project proposal which was turned down by TV5.
"Basta yung isang project, parang dark side ng Sa Ngalan Ng Ina," sabi ni Ate Guy.
She didn't mention the project, in deference to its director who is close to Nora.
Pero sa aming pagtatanung-tanong, at pagsusubaybay sa mga nai-post na rin sa Facebook, ito ang naturang project ni Direk Adolf Alix, Jr., titled Mater Dolorosa.
Papel ng isang inang sangkot sa mga ilegal na gawain ang sana'y gagampanan ni Ate Guy.
Ang isa pang indie filmmaker na may proposed project para kay Nora ay ang Cannes '09 Best Director awardee na si Brillante Mendoza.
Interesado rin si Nora sa nai-propose na konsepto ni Direk Brillante, dahil ang kabuuan ng dialogue na gagamitin ay Bicolano, dialect ni Nora sa Iriga, Camarines Sur.
Mayroon ding proposal si Direk Ellen Ongkeko-Marfil titled Nagmamahal, Iraq na hindi natuloy bilang entry sa Cinemalaya Filmfest's Director's Showcase nuong isang taon.
Kuwento ito ng isang OFW na nagkaroon ng anak sa isang Iraqi sa panahon ng giyera sa Iraq.
AT ODDS WITH DIREK CELSO AND LAV DIAZ. Balita naman sa Amerika ang umano'y paggawa rin sana ng mga independently-produced films ni Nora with award-winning filmmakers Celso Ad. Castillo and Lav Diaz.
Ang kay Direk Celso ang may titulong Do Filipinos Cry In America?
Naiulat na inalok kay Nora ang "indie" na ito bago pa nagkaroon ng problema sa kanyang boses.
"A, 'wag na nating pag-usapan 'yon dahil baka pati anak niya, e, madamay," sabi ni Ate Guy, patungkol sa anak ni Celso Ad Castillo, si Chris, na nagdidirek na rin ng indie features.
Sa mga naunang interview ng PEP, nasabi ni Nora ang dahilan ng sama niya ng loob kay Direk Celso.
"Pinangakuan lang...wala namang nangyari," himutok noon ni Ate Guy.
Mas matindi naman ang naging sama ng loob ni Nora hinggil sa naging kaso ni Direk Lav at mga kasamang taga-pelikula.
May nai-press release na noon ang kampo ni Diaz na indie project daw ni Ate Guy, titled Reclusion Perpetua.
Sabi ni Nora, "Akala ko nga, nung dumating sina Lav Diaz sa L.A., gagawa daw ng pelikulang tungkol sa akin...
"Pero nung dumating sila, wala silang ginawa kundi ipasyal ako sa Santa Monica, sa kung saan-saan.
"Ni walang binanggit sa akin tungkol sa gagawing pelikula.
"Siguro yung budget ang naging problema, hindi ko alam.
"Baka may funding siya, na nagamit sa iba."
Sa ganung sitwasyon, may posibilidad na "nagamit" ang pangalan ni Nora sa publisidad, para sa funding o grant, na hindi naman inilaan sa proyektong tinampukan niya.
"Yun naman ang hindi maganda. Parang gagamitin ang pangalan ko para makakuha ng funding. Pagkatapos, ibang pelikula naman pala ang gagawin," ang sabi ni Nora.
Tungkol dito, sinikap ng PEP na kunin ang panig ni Direk Lav, pero hindi ito nakipagkita maging nang magkaroon siya ng entry sa ginanap na 13th Cinemanila International Film Festival.
May bagong pelikula si Lav Diaz, isang six-hour film, Siglo Ng Pagluluwal (Century of Birthing), na naparangalan ng Special Jury Prize sa CIFF 2011 (Main Competition).
Pero hindi rin sumipot sa CIFF '11 awarding si Direk Lav.
Maging sa opening ng Cinemanila Filmfest this year, kung saan naparangalan naman ng Lifetime Achievement Award si Nora ay "no-show" si Direk Lav.