Hindi lang isa kundi marami ang nakapuna sa payat na pangangatawan ni LJ Reyes ngayon.
Biro nga ng PEP.ph (Philippine Entertainment Portal) sa kanya, nang makapanayam ito sa Christmas party treat ng PPL Entertainment na siyang humahawak ng kanyang acting career, baka nakikiuso siya sa karakter ni Kristen Stewart sa Hollywood movie na The Twilight Saga: Breaking Dawn.
Sa pelikula, nagmistulang buto't balat ang aktres na si Kristen na gumanap na Bela na buntis sa kanyang baby.
Pero si LJ ay higit na isang taon nang nakapanganak sa baby nila ni Paulo Avelino, kaya nakakapagtaka namang gayahin nito ang karakter ng nasabing bidang babae sa sinasabing vampire movie.
"Huwag naman yun! Parang mamatay na yung ganon," bulalas agad ni LJ sa paghahalintulad namin sa kanya kay Bela.
Wala namang diet regimen na sinusunod o ginagawa si LJ para maging dahilan ng pagpayat niya.
"Siguro dahil sa kaka-breastfeed at sa kakaalaga ng bata.
"Kasi hands on naman talaga kami," paliwanag niya.
One year and four months na raw ang anak niya.
Agad naming pinagtakhan kung bakit mahigit isang taon na ay nagbi-breast feed pa ang anak niya samantalang puwede naman ito sa mga processed powdered milk?
"Ayaw niyang tumigil," mabilis na tugon ni LJ kasunod ang pagpapaliwanag ng rason kung bakit.
"Siguro nasanay siya. Sabi nila sa akin...like si Ate Christine Jacob. Kahit yung babies niya, ayaw talagang mag-bottle. Nasanay nga sa breastfeed," saad niya.
Sinubukan na raw ni LJ na sanayin sa bottle feeding ang anak.
"Ay, naku, grabe po. Pati Lola ko, lahat na po nang kamag-anak ko trinay siyang i-bottle feed, pero ayaw. Ayaw niya talaga. So, wala akong choice," paliwanag niya.
Umaayon si LJ na nakukuha raw ng anak niya ang dapat sanang sustansyang para sa katawan niya.
"Kinuha niya nang bongga. Yun lang!" sabay halakhak sa sinabi.
"Kaya lahat ng good nutrients sa kanya napupunta."
Dugtong niya, "Kumakain naman ako ng healthy kasi nagbi-breast feed siya.
"More on gulay, mga ganyan. Healthy food."
RELATIONSHIP PROBLEMS? May pinagdadaanan ba si LJ sa pagsasama nila ni Paulo Avelino kaya siya pumapayat?
"May pinagdadaanan ba ako?" biro niyang tanong.
"Joke lang," bawi niya agad saka nagsalita uli.
"Sa katawan lang.
"Okey pa rin naman kami e," pagpapatunay niya.
Pinagduduahan namin ang pagpapatunay ni LJ na maayos ang samahan nila ni Paulo kaya naman patuloy ang sabi niyang, "Oo naman. Yes!" patungkol sa maayos na relasyon nila ng ka-live in.
May mga bali-balita kasing nagkaka-problema raw sa kanilang pagsasama sina LJ at Paulo.
May mga diskusyon daw ang dalawa na hindi niya kayang ayusin.
"Ano kaya yun? Hindi ko alam e," nangingiting pagtatanong ni LJ.
"Kaya siguro nila naiisip yun dahil hindi niya pinag-uusapan yung tungkol sa amin at yung tungkol sa bata."
A VERY PRIVATE PERSON. "Kasi si Pau naman is a very private person.
"And even before naman po, hindi naman po siya mahilig magsalita tungkol sa pribadong buhay niya.
"Yun nga po, nagtataka rin siya kung bakit parang porke't hindi siya nagsasalita about us, ganun na ang issue.
"Siguro na-weirduhan sila dahil ako very open about it.
"Pero ever since naman, open naman ako sa lahat kahit anong itanong ninyo sa akin, sinasagot ko hangga't makakaya ko, sasagutin ko," paliwanag ni LJ.
Sa natatandaan namin hindi man madaldal si Pau pero hindi ito maramot magsalita pag tungkol sa kanyang anak at kay LJ.
"Pero sobrang liit lang. He lets you in, pero very little lang.
"Hindi siya katulad ko na kahit ano sasagutin ko," ang sabi niya.
Sa paniniwala ng iba, maaaring pasimulan ito ng problema sa pagsasama nina LJ at Paulo dahil sa kanilang pinaniniwalaang perimeter ng personal nilang buhay.
Si LJ ay masyadong vocal sa kanyang pamilya samantalang tikom naman ang bibig ni Pau pagdating sa kanyang mag-ina.
"Alam n'yo po, kung nakikita n'yo lang siya bilang siya sa pribado niyang buhay.
"Makikita n'yo po na sobrang proud niya talaga.
"Ang mahirap lang din po talaga sa trabaho natin, may mga bagay na hindi mo puwedeng...parang, may mga bagay kasi na kailangang manatiling pribado at hindi puwede ipagsigawan.
"Siguro sa kanya, ganun. Kailangan niyang ihiwalay, yung Paulo Avelino at yung Michael Paulo Avelino," paliwanag niya.
KEEPING MUM ON FAMILY. Nito lang, nung lumipat na siya ng ABS CBN mula sa GMA-7, marami ang nakapuna sa pag-iwas nitong pag-usapan ang kanyang pamilya.
Baka pinagbabawalan si Paulo ng Kapamilya network na pag-usapan ang kanyang mag-ina?
"Hindi naman po," pagdi-deny ni LJ.
"Well, siyempre po may kanya-kanyang diskarte yung mga managers namin. I won't deny it naman.
"Pero si Paulo rin naman, hindi naman siya nagdi-disagree sa manager niya kasi parang for him, pribadong buhay niya yun.
"Sa akin naman, walang isyu doon.
"Siguro natatakot lang siya na kahit magbigay siya ng konting details, mapa-bongga na yung kuwento niya, yung ganun."
May pagbabago raw talaga kay Paulo nang lumipat siya sa ABS-CBN.
Ang pag-iwas niyang pag-usapan ang kanyang mag-ina ay dahil sa kanyang career.
"Hindi naman sa hindi niya sinasabi na wala kami sa buhay niya.
"Siyempre, ang ibang tao pag sinabi niyang ayaw niyang pag-usapan, iniisip na [nila] na may problema.
"Iniisip na ng iba na dini-deny kami.
"Ayaw lang talaga niyang pag-usapan.
"Parang feeling niya kasi pag mag-i-interview tayo sa ganyang project, eto na lang ang pag-usapan natin. [Wag yung] buhay niya sa likod ng kamera," pagtatanggol niya sa kasintahan.
Hindi kaya dumating sa point na ang career ni Paulo ang maging dahilan para maghiwalay sila?
"Well, feeling ko hindi naman," paniniwala niyang sabi.
"Kasi alam n'yo po...well...ako kasi ang nakakakita ng lahat.
"Kami lang dalawa ang makakapagsabi kung nakikita ba namin na papunta ito doon o hindi?
"Kasi hindi ko po nakikita na palihis siya. Kasi kung makikita n'yo po siya na wala sa kamera, walang ilaw, sobrang responsible po.
"Very dedicated sa family."
Wala raw nakikitang problema si LJ kay Paulo.
"Very responsible siya, with all my heart ha? Walang echos!"
Ayaw na lang ma-pressure ni LJ sa mga pagpuna ng iba kay Paulo.
"Ang sa akin po, ayoko pong makialam. Siyempre, kung walang kaso, huwag na lang nating gawing issue.
"Kasi hindi naman po problema sa amin e.
"Ang importante ay kung ano kayo sa harap ng hapag-kainan, sa ilalim ng bubong ng bahay ninyo, yung ganun.
"Hindi yung kung ano ang sasabihin ng tao. Kasi minsan, kung ano yung sinasabi ng iba, yun pa ang nakakasira e," paliwanag niya.
NO WEDDING BELLS YET. Tungkol naman sa inaabangang pagpapakasal nina LJ at ni Paulo, wala pa raw sa plano nila ang magpakasal.
"Nakikita ko naman," na ang tinutukoy nito ay posibilidad na maging mister niya si Paulo.
"Nakikita ko naman. Pero ang problema kasi, hindi namin puwedeng madaliin.
"Kung mamadaliin namin ang lahat-lahat ng bagay, baka ma-rattle kami.
"Siyempre, ngayon pa lang nga, kahit sabihin nating one year and four months na yung anak namin, marami pa ring adjustments di ba?
"Hindi naman kami 10 years na ang relationship bago kami nagka-anak. So, kailangan pa rin naming mag-adjust.
"Siyempre ang kasal, hindi naman yun minamadali.
"Pag hindi kami nag-take time...masisira lang. Kawawa naman yung bata.
"So, mas magandang take your time, pero sure," paliwanag niya.
Kapipirma pa lang daw ni LJ ng exclusive three-year contract sa GMA 7. So, baka next year pa ilalalabas yung bago nitong contract.
Ang pinakahuling project na ginawa ni LJ ay Time of my Life sa GMA-7.
Wala pang uumpisahang project ang aktres dahil magsasara na raw ang taong 2011.