Ayaw paawat ang award-winning comedienne na si Eugene Domingo dahil sunud-sunod pa rin ang kanyang mga ginagawang mga pelikula, lalo na ngayong 2011 Metro Manila Film Festival (MMFF) dahil tatlo sa mga official entries ay kasama siya.
Ang sabi ni Eugene na hindi naman daw niya inakala na makakasama ang lahat nang ginawa niyang pelikula para sa taunang MMFF.
Nagulat na lang siya na pumasa ang lahat ng mga pelikulang tinanggap niyang gawin.
"Nakaka-overwhelm kasi nga tatlo pala itong nagawa ko for the MMFF at puro malalaking movies talaga siya.
"Noong um-oo naman ako sa paggawa ng mga movies na ito, hindi pa naman official entries, e. Kaya gawa lang nang gawa.
"Natutuwa naman ako na marami kaming mapapasayang mga tao ngayong Christmas.
"Tuwing December 25 lang naman natin nararanasan na mapanood sa mga sinehan sa malls ay puro mga local films, 'di ba?
"Kumbaga, itong Pasko na ito ay para sa pamilyang Pinoy and I am so happy that I am a part of the MMFF every year dahil sa mga pelikulang ginagawa namin.
"This is our way of supporting the local film industry," diin ni Uge.
Bida si Eugene sa isang episode ng Shake, Rattle & Roll 13 ng Regal Entertainment na "Rain, Rain Go Away" kunsaan dinirek siya ni Chris Martinez.
Sa My Househusband... Ikaw Na! ng OctoArts Films ay siya ang "other woman" sa comedy film na ito ni Jose Javier Reyes.
At sa Enteng Ng Ina Mo ng Star Cinema at M-Zet Productions ay siya pa rin ang sidekick ni Ai-Ai delas Alas na first time na makakatambal si Vic Sotto sa isang pelikula.
Ang maganda raw sa mga roles ni Eugene sa mga MMFF entries niya ay magkakaiba silang lahat at hindi pare-pareho ang kanyang atake.
"Yun naman ang laging hanap natin sa mga film roles na pinagkakatiwala sa atin.
"Gusto ko rin yung magkakaiba para hindi tayo typecast. Yung may ibang napapanood sa atin parati.
"Like sa My Househusband, ginawa ako roon na other woman pero hindi siya sympathetic.
"Yung kaiinisan mo siya dahil masyado siyang loud, atribida siya at nakikialam sa buhay ng ibang pamilya.
"Yung working relationship ko naman with Direk Joey ay taon na ang binilang.
"Mula sa unang movie ko with him na bit player pa lang ako sa Emma Salazar Case ay umabot na kami sa ganitong lugar na napag-uusapan na naming yung magiging character ko sa pelikula niya.
"Baliw-baliwan lang naman ang pagganap ko sa My Househusband pero siyempre, ang mga bida roon ay ang mag-asawang Ryan Agoncillo at Judy Ann Santos.
"Ako ay panggulo lang. Ika ni Direk Joey, added spice ako sa movie ng dalawa.
WORKING WITH AI-AI & VIC. "Sa Enteng Ng Ina Mo, hindi naman puwedeng mawala ang sidekick ni Ina, 'di ba?
"Buhay na buhay pa rin si Rowena, ang pinakadakilang best friend ni Ai-Ai delas Alas. At ang nabago lang ay si Bossing Vic na ang leading man niya.
"Hindi puwedeng wala si Rowena sa tabi ni Ina. Pang-asar lang ako talaga.
"At hindi rin naman ako papayag na hindi ako makasama sa first team up nila Ai-Ai at Bossing Vic.
"Ang pinakaiba sa mga movies na ginawa ko for the MMFF ay itong sa Shake, Rattle & Roll 13.
"Pina-drama ako nang husto ni Direk Chris sa episode namin. And at the same time, nandoon yung element of horror.
"I've done several SSR movies na in the past, mostly, guest role lang.
"Ngayon lang ako nabigyan ng ganitong kalaking role and I am so grateful kay Mother Lily (Monteverde) for giving me this role.
"Na-challenge ulit ako at iyon ang pinakaimportante sa akin," mahabang pahayag pa ni Uge.
WILL SHE WIN AGAIN THIS YEAR? Ilang beses na rin nabigyan ng parangal si Eugene sa MMFF.
Nanalo na siya ng dalawang best supporting actress awards for Bahay Kubo noong 2007 at sa Ang Tanging Ina Mo... Last Na 'To noong 2010.
Umaasa ba siyang manalo bilang best actress naman this year?
Marami siyang makakalaban tulad nila Judy Ann Santos (My Househusband), Marian Rivera and Iza Calzado (Panday 2), Maricel Soriano (Yesterday Today Tomorrow), Carla Abellana (Manila Kingpin: Asiong Salonga) at Ai-Ai delas Alas (Enteng Ng Ina Mo).
"Masyado namang maaga para mangarap, 'di ba?" tawa niya.
"Kung ano man ang maganap sa awards night, tiyak na magiging masaya kaming lahat.
"Wala namang masasabing competition kasi lahat kami, we did our best para matuwa at masulit ang mga binabayad nila sa sinehan.
"Whoever wins, happy kaming lahat. At siyempre, mas happy kami kung lahat ng entries ay magiging top-grossers sa MMFF."
WHICH FLOAT? Sa magiging parada ng MMFF, saan bang float sasakay si Eugene?
"Mahirap bang mamili?" tawa pa niya.
"Siyempre, doon na ako sa float ng Shake, Rattle & Roll 13.
"For the simple reason na malalakas na ang mga bida ng dalawang movies kunsaan kasama rin ako.
"Sa My Househusband, nandoon na sila Ryan at Juday.
"Sa Enteng Ng Ina Mo ay nandoon na sila Ai-Ai at Bossing Vic.
"Kaya doon na ako sa Shake, Rattle & Roll 13. Makakasama ko naman ay mga bagets na kaedad ko!" malakas na tawa niya ulit.
Ang daming nangyari kay Eugene sa taong ito.
Una ay ang mga kumitang pelikula na kasama siya tulad ng My Valentine Girls, Who's That Girl?, Wedding Tayo... Wedding Hindi, Zombadings 1: Patayin sa Shokot si Remington at Ang Babae Sa Septic Tank na nakapasok sa shortlist para ma-consider sa Best Foreign Language category ng Academy Awards.
Maging sa TV ay naging busy rin si Uge sa paggawa ng Sa Ngalan Ng Ina at Lucky Numbers sa TV5; at Comedy Bar at JejeMom sa GMA-7.
May mga nakahanda nang mga bagong projects para kay Eugene sa 2012. Kabilang diyan ang part two ng successful launching film niya na Kimmy Dora at ang sequel din ng Here Comes The Bride.
"It's a very fruitful year para sa akin. Hindi pa naman tapos ang taon, e, kaya baka may mga dumating pa!" tawa pa ni Uge.
"Lahat naman ng ito ay blessing at pinag-iingatan natin lahat 'yan.
"Kung ano ang dumating sa buhay natin, tanggapin natin nang maayos at pagsikapan ang lahat ng mga biyaya galing sa Panginoon."
ON PIOLO PASCUAL. Inusisa rin si Eugene tungkol sa kanyang kaibigan na si Piolo Pascual na dumaraan sa isang matinding intriga kaugnay ng pakikipaghiwalay nito kay KC Concepcion.
Ayon kay Uge ay nagkakausap naman daw sila ni Piolo pero hindi raw nila napag-uusapan ang tungkol sa nangyari with KC.
"Kami naman ni PJ, kahit na magkaibigan kami, hindi namin ugali na tanungin ang anumang personal na bagay.
"Bilang respeto na lang iyan sa pagiging magkaibigan namin.
"Siguro kung siya ang magkukuwento, makikinig naman ako.
"Hindi ako maghuhusga. Bilang kaibigan, nandiyan ka para makinig sa kanya at kung hingan ka ng advice, may maibibigay ako.
"Pero kung hindi naman, mabuti na yung pinapabayaan na lang natin.
"Basta ako, I am here for my friend anytime na kailangan niya ng makakausap at makikinig sa kanya," pagtatapos pa ni Eugene Domingo.