Emosyonal na humarap sa camera si Janelle Manahan, nobya ng napaslang na aktor na si Ramgen Revilla, para sa eksklusibong panayam ni ABS-CBN News anchor Korina Sanchez.

Dito ay inamin ni Janelle ang hinanakit niya sa pamilya ni Ramgen partikular sa kapatid nitong si Ramona "Mara" Bautista.

Hindi pa matukoy ang kinaroroonan ngayon ni Ramona matapos itong umalis ng bansa noong Nobyembre 4 patungong Hong Kong at Turkey.

JANELLE'S CONDITION. Narito ang naging pag-uusap nina Korina at Janelle, na ipinalabas sa primetime news program ng ABS-CBN, ang TV Patrol, kagabi, Disyembre 9.

Una ngang kinumusta ni Korina ang kondisyon ngayon ni Janelle matapos itong lumabas sa ospital.

Mahigit isang buwan na ang nakaraan nang sumailalim sa sampung oras na operasyon ang dalaga noong November 7 para maisaayos ang facial fractures na dulot ng tama ng bala sa ilalim ng kaliwang mata niya at tumagos sa kanang panga.

May tama rin siya ng bala sa kanang balikat.

Korina: "Janelle, magandang hapon sa iyo. Kumusta na ang therapy mo? Hindi ka ba nahihirapang magsalita?"

Janelle: "Okay na po 'yung pananalita. Mas more 'yung pain dito
[kanang panga], so hindi ko po puwedeng i-open masyado 'yung mouth ko."

Korina: "Bakit ka naka-sling ngayon?"

Janelle: "Meron po siyang fracture dito [sa kanang balikat]. Dito po
'yung gunshot, so nu'ng lumabas siya dito, parang nabali po 'ata 'yung
buto."

Korina: "Pero mukha ang tinamaan, meron kang kaunting pekas sa ilalim ng kaliwa mong mata."

GENELYN MAGSAYSAY. Sumunod na itinanong ni Korina ang tungkol sa ina ni Ramgen na si Genelyn Magsaysay.

Sa isang interview kasi ay may pakiusap si Genelyn kay Janelle na, "Sana makapag-isip-isip ka pa.

"Tignan mo yung both sides. Huwag mong idiin kami ng aking mga anak."