Nakasaad din sa baptismal certificate na "professional boxer" ang propesyon ng biological father ng bata.

November 2005 daw nang huling magkita sa isang hotel sa Cebu City sina Joanna, Manny, at ang kanilang anak.

Ito ang bihirang pagkakataon na nakunan ng litrato na magkasama ang tatlo.

Ang Cebu trip daw ang huling beses na pagtatagpo nila dahil mula noon ay hindi na raw sinagot ni Manny ang mga tawag sa telepono at text message ni Joanna.

FILING A COMPLAINT. Nagpasya si Joanna na magsampa ng reklamo para magbigay ng sustento sa kanyang anak si Manny.

Ayon kay Joanna, nakatanggap siya ng mga tawag mula sa asawa ni Manny na si Jinkee Pacquiao para hindi niya ituloy ang pagsasampa ng kaso.

Dagdag pa ni Joanna, "Meron pong pinapirmahan sa akin si Atty. Jeng Gacal [Pacquiao's legal counsel].

"Parang nakasulat po doon sa papel na, 'Ako po si Joanna Rose Bacosa, tumanggap ng P500,000 at pumapayag sa P10,000 monthly na support at nangangako na kahit kailan, hindi na magsasampa ng criminal o civil case laban kay Manny Pacquiao.'"

January 2006 naman daw nang makatanggap si Joanna ng phone call mula kay Manny.

Nagagalit daw sa kanya ang boksingero dahil sa desisyon niya na magdemanda para sa child support.

Sa interbyu kay Joanna ng isang daily broadsheet noong February 2006, ikinuwento niya na hindi naging maganda ang resulta ng pag-uusap nila ni Manny sa telepono dahil umiral ang galit.

Ayon kay Joanna, nagsalita si Manny na ipakikidnap daw ang kanilang anak para walang ebidensiya na nagbunga ang relasyon nila.

Samantala, ipinakita ni Joanna sa News5 ang mga dokumento at ang litrato na kuha sa Cebu City na magpapatunay raw ng relasyon nila noon ni Manny.

Hindi napigilan ni Joanna na mapaluha nang sabihin nito na bukod sa monthly allowance na natatanggap mula kay Manny, gusto niya na kilalanin ng Filipino boxing icon ang kanilang anak.

Ayon kay Joanna, "Gusto ko pong masabi sa anak ko na pagdating po ng panahon, makita rin ng anak ko na ipinaglaban din siya ng mommy niya para po kilalanin ng ama niya na si Manny Pacquiao."