Sa kabila ng mga kontrobersiyang kinasangkutan ni Baron Geilser, nananatiling matatag pa rin ang aktor sa pagharap sa mga ito at patuloy na nagpapamalas ng kanyang husay sa pag-arte.
Kasama si Baron sa pelikulang Manila Kingpin: The Untold Story of Asiong Salonga, na kalahok sa Metro Manila Film Festival ngayong Disyembre.
Kontrabida ang ginampanang papel ng aktor at napakaimportante ng kanyang karakter sa nabanggit na pelikula.
Nananatiling positibo naman ang aktor sa kanyang pananaw sa buhay sa gitna ng mga kontrobersiya ng 2011.
"Crazy, pero it's a blessed year for me. And I'm very thankful and I'm still in gratitude.
"I learned in rehab how to be patient and humble, and my 2011 taught me a lot of lessons," pagbanggit niya sa mga natutunan nang pumasok siya sa rehabilitation center upang labanan ang labis na pag-inom ng alak.
Ano ang mga balak ni Baron sa paparating na Bagong Taon?
"I want now to be successful in my career, and sana tuluy-tuloy na talaga.
"And ako naman, talagang magko-concentrate na ako sa trabaho ko. I want to work with all the actors here in the industry."
STILL DRINKING? Kamakailan ay nasangkot sa intriga ang kanyang pangalan na may kinalaman pa rin sa pag-inom.
Diumano ay hindi siya pinaalis ng bansa ng immigration authorities para sa isang out-of-the-country taping ng Maalaala Mo Kaya [MMK] dahil sa pag-inom sa set ng nasabing palabas.
"Okay naman ako, tuloy-tuloy pa rin sa recovery, concentrate na lang sa career.
"'Di na ako tumitikim ng alak. The last time was sobrang tagal na.
"Yung regrading sa issue sa MMK, that's not true. Ang naging problema ay sa immigration.
"Siyempre, may past na ako sa ganyan. So, pagka may aberyang kunwari na nangyari, yun na kaagad ang issue.
"Uulitin ko, 'di natuloy ang flight ko dahil sa immigration.
"Hindi ako umabot [sa requirements], not because I've been drinking or lasing ako."
PEP UPDATE. Ngunit sa pananaliksik ng PEP.ph (Philippine Entertainment Portal) tungkol sa isyung ito, isang Kapamilya source ay nagbibigay-duda sa mga sinabi ni Baron.
Una, sabi ng source, hindi raw siya puwedeng pangalanan dahil "sinabihan kami ng production na 'wag magsalita."
Ang tinutukoy nito ay ang production team ng MMK, ang ABS-CBN show na hosted mismo ng network president na si Charo Santos.
Ngunit tinitiyak ng source na may nangyari talagang kaguluhan at sangkot dito si Baron.
"I was there when it happened," sabi ng source.
"It was a big and scary scandal sa loob ng plane. Akala ko, pati kami madadamay.
"Pero kahit hindi kami nagsalita, nakalabas pa rin naman kasi maraming nakakita."
Nakainom nga raw si Baron. Sa airport pa lang daw kasi ay inom na ito nang inom ng alak.
Nang nasa loob na ito ng eroplano, mas maingay pa siya at nakatatawag na ng pansin ng ibang pasahero, hanggang sa pinalalabas na raw siya sa eroplano ng flight attendant.
Inaway naman daw nito ngayon ang flight attendant, kaya lalong nabulabog ang ibang kasabayan sa flight na Canada ang destinasyon, hanggang sa tinawag na ang mga awtoridad.
Samantala, nagdesisyon na rin daw ang MMK team na huwag nang isama si Baron sa Toronto, kung saan nakatakdang gawin ang isang episode ng long-running program.
Ang naging sudden replacement niya ay si Tom Rodriguez, na kasama rin sa MMK entourage.
FROM KAPAMILYA TO KAPATID? Samantala, mukhang nalagpasan naman ni Baron ang isyung iyon, at ngayon nga ay may mga nakalinyang proyekto para sa kanya sa 2012.
Bilang panimula, nagulat ang ilan nang mapanood ang interbyu at feature kay Baron sa isang showbiz talk show ng Kapatid network.
Nakakagulat, dahil hindi kalakalan sa networks ang bigyan-pansin ang hindi nila talents, liban na lang kung may hot news tungkol sa mga ito.
Kaya madalas, kapag nakitang ang isang Kapamilya talent ay binigyan ng positive play sa Kapatid network (at vise versa), hudyat ito ng kung sino ang mabango, inaawitan, o gustong alagaan ng Kapatid network.
Di naglaon, ito na ang turan ni Baron, "May gagawin daw ako sa TV5, sabi ng manager [Arnold Vegafria] ko.
"Wala akong contract sa ABS[CBN].
"Open lang siguro kami sa mga possibilities."