Bukas, December 28, ang Gabi ng Parangal ng 37th Metro Manila Film Festival. Gaganapin ito sa Newport Performing Arts Theater ng Resorts World Manila, sa Pasay City.
Bukod sa mga inaabangang parangal para sa Best Festival Picture, Director, Lead Actress and Lead Actor, Supporting Actress and Actor, Child Performers, Story and Screenplay,Technical Awards, at Best Float ay ang mga Special Awards tulad ng Gatpuno Antonio J. Villegas Award at Most Gender Sensitive Film Award.
Napabalita ring may award, o special recognition, na ipagkakaloob ang 37th MMFF ngayong 2011 para sa Superstar na si Nora Aunor.
Ito ay bilang pagkilala sa mga naging kontribusyon at karangalang natamo ni Ms. Aunor, bilang bahagi ng taunang Metro Manila Filmfest simula noong 1975.
At the last minute, balitang kinansela ng Metro Manila Film Festival [MMFF] Executive Committee ang parangal kay Nora Aunor.
"Hindi na tuloy ang award ni Guy sa MMFF," pag-inform ni Boy Palma, Nora's personal manager, sa Philippine Entertainment Portal (PEP.ph) kaninang umaga, December 27.
Guy ang bansag kay Nora.
Agad nagpadala ng mensahe si Palma upang sagutin ang mga katanungan ng PEP.ph (Philippine Entertainment Portal) tungkol dito.
"Akala daw nila, hindi puwede...[dumalo] si Guy, kaya hindi na nila itinuloy ang [pagbibigay ng] award," pambungad ni Palma, na ang tinutukoy ay ang MMFF Executive Committee.
"Si Suzette [Ranillo] daw dapat ang magbibigay ng mga details [ng awarding].
"Hinintay nila si Suzette, pero nalaman nila na umalis na [si Suzette] papuntang States, kaya kinansel ang award."
Umalis papuntang U.S. si Suzette para doon mag-Christmas kasama ang kanyang veteran actress-mom, Gloria Sevilla.
Wala pang pagkakataong makausap ng PEP ang aktres na si Suzette Ranillo, na sinabi ni Boy Palma ay siyang nagparating ng umano'y "unavailability" ni Ms. Aunor sa MMFF.
"Bakit si Suzette ang kinausap nila? Sana ako, o sinumang taga-TV5 [management]," banggit din ni Palma.
COURSE THROUGH TV5. Bilang exclusive contract artist ng Kapatid network, lagi raw ipinababatid nina Nora at ni Palma sa lahat ang nararapat na pakikipag-ugnayan sa management ng TV5.
Kasama sa mga contact persons, ayon kay Palma, ay sina TV5 CEO Atty. Ray Espinosa, at Perci Intalan, Creative/Entertainment Head.
Ang mga ito ang sinasabihan ng anumang bagay na may kinalaman sa propesyon ni Nora Aunor, kasama na ang film offers at mga parangal.
Bukas ang PEP sa panig ninuman, sa mga opisyal at staff ng 37th MMFF Executive Committee at ang mga katuwang na mga ahensiya, upang magbigay linaw sa isyung ito.
SUZETTE'S FAULT? Ayon din kay Palma, sa puntong ito ay hindi na mababago ang MMFF Awards Programme kaya hindi na maisasali pa ang special award ni Nora.
"Wala na raw time para magawa ang plaque," aniya.
"Si Suzette daw kasi ang kausap nila."
Si Suzette Ranillo ang siyang designated ng TV5 bilang tagapag-ugnay ni Nora Aunor sa sinumang may pakay dito na pampropesyunal.
Ngunit ayon kay Palma, kailangan ring makipag-ugnay muna si Suzette sa kanya, dahil si Palma ang tumatayong manager at schedule master ng aktres.
Lumilitaw na hindi isinangguni ni Suzette Ranillo ang mensahe ng 37th MMFF Awards Committee hinggil sa ipagkakaloob sanang special award kay Nora.
Wala raw isinangguni kay Boy Palma at wala rin sa sinuman sa TV5 management.
Nanghihinayang man, ani Palma, "Okey lang naman kay Guy. No problem. Napakarami na'ng award ni Guy this year."