Marami ang nagtatanong kay Manay Ichu Maceda tungkol sa usapin sa pagkaka-disqualify ng entry ng Regal Films na Yesterday Today Tomorrow na manalo ng mga major awards sa Metro Manila Film Festival 2011.
Isa sa miyembro ng executive committee ng MMFF si Manay Ichu.
“Actually, may violation kasi,” pahayag ni Manay Ichu nang makapanayam ng PEP.ph (Philippine Entertainment Portal) nuong Miyerkules, December 28, sa gabi ng parangal ng MMFF sa Newport Performing Arts Theater sa Resorts World.
“Na kapag binago nang husto ang istorya… major revision from the approved storyline, magkakaroon ng penalty.
“Na… number one… forfeiture ng performance bond na 500 thousand [pesos].
“Number two… disqualification from participating in next year’s film festival.
“Number three… disqualification from the awards.
“So we decided [to give the] least heavy [penalty]. Which is to disqualify [Regal] from the awards.
“Hindi namin binawi ‘yong 500 thousand. Hindi namin sila [Regal] pinagbawalan na mag-join next year.
“At ‘yong sinasabi na… lahat naman ng script binabago at may mga revisions, totoo ‘yan. Lahat ng script may revisions.
“Pero kapag ang binago mo ay ‘yong istorya, kahit pa you stick to the same genre, iyon ang malaking deviation na tinatawag.
“Ibang-iba na kasi no’ng ma-revise [‘yong script ng Yesterday Today Tomorrow].
“Sa original script, ang story tatlong magkakapatid na babae. Dito [sa final na kinalabasan ng pelikula] kapag pinanood ninyo, ibang-iba na," ayon kay Manay Ichu.
Nagkausap na ba sila ng Regal Films producer na si Mother Lily Monteverde?
Balita kasing labis umanong ikinasama ng loob nito ang naging desisyon ng MMFF committee.
Dahilan para pagboykotin at huwag nang padaluhin nito sa awards night ang mga artista ng Yesterday Today Tomorrow at maging ang cast din ng isa pa nitong entry na Shake Rattle & Roll 13.
“Yes.
“In fact yesterday [Martes December 27] no’ng nag-meeting kami sa execom, inimbitahan namin si Mother Lily to explain her side because we believe in due process,” ani Manay Ichu.
Pero mukhang hindi pa rin naayos ang usapin dahil pinagboykot nga ni Mother Lily ang mga artista niya at hindi na pina-attend ng MMFF awards night.
“Nakakalungkot. Nakakalungkot.
“You know… I can understand what she’s going through.
“But then, a… we have been very lenient already.
“This is the second time for Mother Lily.
“Because the first time, nong winidraw niya ‘yong Hototay. Dapat ‘yon, may penalty na rin iyon. Na… ma-forfeit na rin ‘yong performance bond.
“Pero hindi namin ginawa. Kasi we just opted to receive a letter from her informing us that she was withdrawing Hototay,” aniya.
May sinasabi ang kampo ni Mother Lily na nagpadala raw sila ng notice sa MMFF committee tungkol sa revision sa script ng Yesterday Today Tomorrow.
“No. Ang ipinadala nilang notice was a change in the casting which is the filmography. Which made no mention whatsoever of the deviation from the originally approved script and storyline," ang sabi ni Manay Ichu.
Balitang may nasabi rin diumano si Mother Lily na baka ‘yong ganitong pangyayari ay senyales na rin daw para huwag nang sumali pa ang Regal Films sa mga susunod na taon pa ng MMFF.
“A… I hope not. I hope not.
“Because kailangan natin si Mother Lily.
“Marami siyang kontribusyon sa industriya ng pelikula.
“So… I hope na ito ay pansamantala lamang. ‘Yong sama ng loob. ‘Yong tampo niya. Oo.
“But I’m looking forward na next year, sasali ulit siya,” ang sabi ni Manay Ichu.
BOX OFFICE RETURNS. Labis naman ang kasiyahan ng isa pang miyembro ng executive committee sa kita sa takilya ng MMFF 2011.
Ibinahagi nito ang total gross sa takilya ng pitong kalahok na pelikula as of December 27 (pangatlong araw ng filmfest):
“For the first three days, number one talaga ang Enteng Ng Ina Mo… 91 million. Panday 2 got 51 million. Ang Segunda Mano got 49 million.
“Tapos ang Shake, Rattle, & Roll… 46 million.
“Then House Husband… 22 million.
“Sumunod ay ang Asiong Salonga na… almost 8 million.
“And… Yesterday Today Tomorrow… 4.1 million.”
Mas maganda raw ang box office result ng MMFF ngayong taon kung ikukumpara last year.
“Even ‘yong pinakamahinang pelikula, malakas ngayon. Kumpara mo sa mga nakaraang festival natin," ayon sa miyembro ng execom.
“Sa tingin ko, kayang maabot ‘yong target nating 600 million na gross sa pagtatapos ng MMFF. Kaya.
“At malaki pa ang magiging pagbabago pagkatapos ng awards night.
"Sa experience natin sa siyam na taon sa festival, ‘yong mga nanalo ng awards especially ng best picture will surpass another two [entries sa ranking ng box office performance].
“Halimbawa ang Asiong, kung number 6 ngayon, magiging number 4 ‘yan. More or less.
“Pero ‘yong top three, Enteng pa rin, Panday, at Segunda Mano. Mahihirapan na matinag ‘yong tatlong ‘yong sa rank nila.
"Mahaba pa ang natitirang tatakbuhin ng festival. So… may sapat na panahon pa ang lahat na manood ng mga pelikulang kalahok dito.
“Kami sa execom ay nagpapasalamat sa ating mga manonood sa napakagandang naging outcome ng MMFF lalo ‘yong first three days na nagkaroon tayo ng increase na mga ten percent kumpara no’ng last year.
“At sa tingin nga namin, ‘yong ating target na 600 million ay makukuha natin. Magaganda namang lahat ng entries, e. Sana ay mapanood natin ang pitong entries na ito.
“And with this development, siguro ay mas magiging maganda na ang agting preparasyon for next year. Dahil sa February ay magkakaroon na naman tayo ng launching for 2012 38th Metro Manila Film Festival.
“Itong success na ito ay success nating lahat. Na sana ay magpatuloy."