Excited na si Valenzuela City councilor at Wil Time Bigtime co-host Shalani Soledad sa nalalapit niyang pagpapakasal kay Pasig City Representative Roman Romulo sa January 22, bisperas ng Chinese New Year.

Ibinahagi ni Shalani at ng kanyang kaanak sa News5 ang ilang detalye ng kasal, gayundin ang wedding preparations na ginagawa nila.

Napanood ito kagabi, Enero 5, sa early primetime news program ng TV5, ang Aksyon.

Ayon sa pinsan ni Shalani na si Councilor Martell Soledad, pina-feng shui pa ng soon-to-be husband and wife kung ano ang pinakasuwerteng araw ng kasal nila.

Sabi ni Martell, "Ang lumabas nga, January 22 yung pinakasuwerte daw para sa kanilang dalawa bilang couple."

Ang St. Benedict's Church sa Cavite ang napili nina Shalani at Roman na venue ng wedding.

Ang motif ay green at violet, na favorite colors daw ni Roman.

Ang magdidisenyo ng gown ni Shalani ay ang sikat na fashion designer na si Inno Sotto.

Nang matanong nga si Shalani tungkol sa kanyang wedding preparations, matipid naman ang kanyang naging sagot, "Actually, inaayos pa ang lahat."

Simple lang daw ang kasal.

Nailaan na raw kasi nila ang pera sa mga biktima ng Bagyong Sendong sa Cagayan de Oro.

Kasama sa mga ninong at ninang ang dating boss ni Shalani na sina Senator Ping Lacson, Department of Foreign Affairs Secretary Albert del Rosario, Congresswoman Cynthia Villar, at TV5 Chairman Manny V. Pangilinan.

THE ANNOUNCEMENT. Matatandaang buwan ng Setyembre noong isang taon nang i-announce nina Shalani at Roman ang kanilang engagement.

Nag-propose si Roman kay Shalani sa Our lady of Fatima Church sa Valenzuela.

Isang diamond ring ang ibinigay ng congressman sa lady councilor.