"Sandali, papa-bless ko muna siya para magkaroon ng happy lovelife!" birong natatawang sabi ng manager ni Diether Ocampo na si Monch Novales nang lapitan ng PEP.ph (Philippine Entertainment Portal) ang Kapamilya actor para sa panayam na ito.

Blessing kasi ng bagong opisina ng Star Magic kaya naroon si Father Carmelo Calauag kahapon, January 9, sa ELJ Bldg. ng ABS-CBN.

Ang nasabing pari ang nag-officiate ng misa at nagbendisyon ng bagong tanggapan ng talent arm ng Kapamilya network.

Sunud-sunod sina Shaina Magdayao, Jessy Mendiola, Vina Morales, at Diether na binendisyunan ni Father Calauag.

Kinausap isa-isa ni Father Calauag ang mga artista na parang may mga wish na sinasabi tsaka sila dadasalan.

Matapos no'n, paglingon namin, kakuwentuhan na ni Diether ang Angelito actor na si JM Guzman.

Medyo seryoso ang usapan nina Diet (palayaw ni Diether) at JM kaya hinayaan muna namin sila.

HAPPY LOVELIFE? Nang makita naming patapos na ang kanilang pag-uusap ay niyaya na namin si Diet na umupo kasama namin.

"Ayan, na-bless ka na. Magkaka-lovelife ka na!" biro namin sa aktor.

"Harinawa!" natawa naman niyang sagot.

Wala ba talaga siyang lovelife?

"Ang daming binibigay sa 'king trabaho ni God, e," pakli ni Diet.

ALL ABOUT ALTA? Ano ba ang kasunod na project niya pagkatapos ng Guns and Roses nila nina Robin Padilla at Bea Alonzo?

Nabalitang kasama si Diether sa teleseryeng Alta na pagsasamahan nina Gretchen Barretto, KC Concepcio,  at Angelica Panganiban.

Pero may mga usap-usapang mukhang hindi na raw ito matutuloy.