May rason ang kaligayahang nararamdaman ngayon ni Arci Muñoz dahil sa mga sunud-sunod na malalaking pangyayari sa kanyang showbiz career.
Sa panayam ng PEP.ph (Philippine Entertainment Portal) kay Arci matapos ng guest appearance niya sa Paparazzi kahapon, January 15, sa studio ng TV5, masaya itong ibinalita ang ilang nangyayari sa buhay niya.
Una na, sa Sinulog Festival daw ng Cebu idinaos ang kanyang 23rd birthday celebration, noong Huwebes, January 12.
Kuwento ni Arci, "Nagbigay sila sa akin ng surprise birthday celebration, tapos may cake.
"Sa presscon ginawa yung surprise birthday celebration sa akin.
"May presscon kasi doon lahat ng TV5 artists na nag-Sinulog."
NEW MANAGER. Sigurado ring mas magiging abala si Arci ngayong 2012.
May lalabas na siyang serye, ang Felina, at napipinto rin ang paggawa niya ng record album at pelikula.
Ibinalita rin niyang dalawa na ang managers niya ngayon: kung dati ay si Annabelle Rama, ngayon ay si Annabelle Rama at ang Viva Films' big boss na si Vic del Rosario.
Si Boss Vic ay manager din nina Sarah Geronimo, Anne Curtis, Cristine Reyes, at nitong huli ay ang nagbalik-Viva na si Megastar Sharon Cuneta.
Ayon kay Arci, "Si Boss Vic ang magha-handle ng recording, movie, and endorsements.
"Bale, si Tita Annabelle ang TV.
"Siyempre, pag may nag-offer kay Tita Annabelle na movie, kakausapin niya si Boss Vic.
"'Ano? Okey ba ito?' Parang gano'n.
"Basta, co-manage ako ni Boss Vic at ni Tita Annabelle."




0

