Magkakaroon na ng sarili niyang musical show sa ABS-CBN si Sarah Geronimo.

Ang magiging titulo nito ay Sarah G. Live! at mapapanood ito tuwing Linggo ng gabi simula sa Pebrero.

Kinumpirma mismo ni Sarah ang balitang ito sa thanksgiving party niya para sa press kagabi, January 18.

Ginanap ang pagdiriwang sa pag-aari ng mga Geronimo na Imo's Pancit Malabon restaurant, sa may Mindanao Avenue, Quezon City.

Sabi ng Pop Princess sa kanyang bagong show: "Very happy po ako sa concept nung show.

"Pangalan ko po ang dadalhin ko dito, na ninenerbiyos po ako kasi, siyempre, sariling show na natin 'to.

"But, of course, makakasama ko ang ibang artists din, magagaling na artists.

"So, abangan po natin."

Hindi pa kumpirmado, pero posibleng ang show ni Sarah ang papalit sa timeslot na maiiwanan ng Gandang Gabi Vice ni Vice Ganda tuwing Linggo ng gabi.

Matatandaang sa mahabang panahon ay si Sharon Cuneta ang may hawak ng Sunday primetime slot ng ABS-CBN—mula sa kanyang musical-variety show na The Sharon Cuneta Show hanggang sa talk-variety program niyang Sharon.

Pero ngayon ay kay Sarah na ipagkakatiwala ng Kapamilya network ang timeslot na ito.

Sabi naman ni Sarah tungkol dito, "Nabigyan lang po ako ng pagkakataon na, 'yon, makakita pa sila ng mas maraming performances."

Pero ano ang pakiramdam na meron na siyang sariling musical show?

"Siyempre ho, nung una ayoko, natatakot ako.

"Kasi sariling show ko na 'yon, e, saka malaking responsibility 'yon sa akin as an artist.