Inamin ni Isabel Oli sa PEP.ph (Philippine Entertainment Portal) na hanggang ngayon ay mahirap pa rin sa kanya ang makapag-move on sa breakup nila ni Gab Valenciano.

Apat na buwan lang ang itinagal ng kanilang relasyon, pero wala raw siyang masasabi sa maikling panahong yun dahil masaya raw silang dalawa.

Pero hindi maipaliwanag ni Isabel kung bakit umabot sila sa desisyong maghiwalay noong magpa-Pasko ng nakaraang taon.

GAB & COLEEN? Itinanggi ni Isabel ang isyung may third party na involved sa hiwalayan.

Pero hindi naman niya masagot ang kuwentong nagkakamabutihan na raw ngayon si Gab at ang young star na si Coleen Garcia.

Inamin ni Isabel na nakakarating sa kanya ang mga kuwentong yun, pero ayaw niyang magkomento.

Ang latest na nakarating sa PEP ay magkasama sina Gab at Coleen na nanood ng laro ng Philippine Basketball Association (PBA) sa Araneta Coliseum kagabi, January 25.

May nagkuwento ring pagkatapos nilang manood ng PBA ay tumuloy sina Gab at Coleen sa Republiq sa Resorts World Manila, at marami ang nakakitang sweet daw ang dalawa.

Tumanggi si Isabel na magkomento tungkol dito, kahit nakita na niya sa Twitter account ni Gab ang mga litratong magkakasamang nanood ng laro sina Coleen, Cesca Litton, at Eric Tai.

STILL HURTING. Inamin ni Isabel na masakit pa rin sa kanya hanggang ngayon, kaya ibinubuhos na lang daw niya ang sarili sa trabaho at sa pamilya.

"Mahirap. Ang hirap talaga, sobra," sabi ng aktres.

"Hanggang ngayon, mahirap pa rin.

"Buti na lang, bugbog ako sa work. Kahit papa'no nada-divert din yung atensiyon."

Kaya rin siya nahihirapan ay dahil mabait pa rin daw sa kanya ang pamilya ni Gab.

Nagti-text pa raw sa kanya minsan ang ina ni Gab na si Angeli Pangilinan-Valenciano, isang talent manager, para kumustahin siya.