Hanggang ngayon ay nagpapagaling pa rin si JC Tiuseco matapos niyang maoperahan sa tuhod noong Agosto ng nakaraang taon.

Bunsod ito ng aksidenteng nangyari sa kanya sa isang basketball game, na naging sanhi para magkaroon siya ng torn ACL o Anterior Cruciate Ligament.

Ayon sa medicine.net, ang Anterior Cruciate Ligament ay isang klase ng ligament sa tuhod na nagdudugtong ng buto sa ating hita at binti.

Ipinaliwanag noon ni JC sa PEP.ph (Philippine Entertainment Portal) kung papaano gagawin ang operasyon sa kanyang tuhod.

"Lalagyan ng screw ang bagong ligament [ng tuhod ko]. Magga-graft ng ligament tapos ilalagay sa loob.

"Then after eight months ng therapy, puwede na ulit ako mag-basketball."

(CLICK HERE for related article.)

Nasa ika-limang buwan na siya ng pagte-therapy, pero sa tingin daw ng kanyang mga doktor, baka sa Pebrero o Marso ay maayos na ang lagay ng tuhod ni JC.

Nakapanayam ng PEP at ilan pang entertainment press si JC kahapon, Enero 26, sa set ng Kokak sa Sevilla Street, Barangay Pedro Cruz, San Juan, at aming kinamusta ang kanyang operasyon.

Aniya, "May part lang na sumasakit.

"Pero, 'yong ligament daw mismo na pinalitan, hindi naman daw mapupunit, parang pinapalakas na lang."

MOVIE LINEUP. Kaugnay nito, kinailangan tanggihan ni JC at ng kanyang manager na si Jonas Gaffud ang ilang pelikula na inialok sa kanya ng Regal Films noong nakaraang taon.

Matatandaan na noong Mayo 12, 2011 ay pumirma ng kontrata sa Regal Entertainment si JC; kasama ang iba pang talents ng Mercator Model and Artist Management na sina Daniel Matsunaga, Ervic Vijandre, Ian Batherson, at Fabio Ide.

Tinagurian silang "Regal's Desirable Men."

(CLICK HERE for related article.)