Nangako si Jericho Rosales na sasali siya XTerra Offroad Thriatlon series, kung saan major sponsor ang ine-endorse niyang Vaseline Men, sa presscon mismo ng nasabing sports event kahapon, February 8, sa Dusit Thani Hotel, Makati.

Ayon kay Echo (palayaw ni Jericho), gusto niyang makilahok sa Pang Rave Run na gaganapin sa Timberland Heights, San Mateo, Rizal sa February 26.

Para sa aktor, medyo malabong makasali siya sa March 17 to 18 na gaganapin naman sa Liloan, Cebu City, kung saan ang mananalo ay magiging representante sa XTerra World Championships na gaganapin sa Maui, Hawaii.

Dahil ang triathlon ay kumpetisyon sa pagtakbo, pagbisikleta, at paglangoy, nagbiro pa ang Kapamilya actor na, "Puwedeng may surfboard sa swimming?"

Kilala kasi si Echo sa pagiging mahilig sa surfing. Kung wala siyang showbiz commitment ay malamang nasa La Union siya at nagse-surfing.

TELESERYE WITH PIOLO? Napadako naman ang usapan sa teleseryeng pinagsasamahan nila ni Piolo Pascual sa ABS-CBN, ang Nang Dahil sa Pag-ibig.

Tinatanong ng kanilang mga tagahanga kung kailan ito magsisimulang umere.

"March?" hindi siguradong sagot niya sa PEP.ph (Philippine Entertainment Portal).

"Sabi nila March daw," dugtong niya.

Nakailang taping days na ba sila?

"Honestly ako one day," sagot niya na ikinabigla namin dahil noong nakaraang taon pa sila nagsimulang mag-taping.

"Sila marami na... Only because yung character ko comes out later pa," paliwanag ni Echo.

"Hindi siya yung... yung character ni Piolo comes out in the beginning, e.

"Ako, yung beginning ng story namin, bata ako, e."

Kuya ba niya si Piolo sa kanilang serye?

"Hmmm, sino bang mas matanda sa amin? Hindi naman," nangingiti niyang sabi .