May bago na namang show si Alex Gonzaga sa TV5.  Sa pagkakataong ito, magiging host naman siya ng isang bagong game show, ang TOINK!  Sino Ang Tama? na mapapanood na simula sa Linggo tuwing alas-dos ng hapon.

Makakasamang co-host ni Alex si Chris Tiu.

Ayon kay Alex, "Game show ito at masayang-masaya ito. Manghuhula kayo at kumbaga, idya-judge mo ang tao kung ano sa tingin niya ang sagot niya. 

"Minsan kasi, akala mo hindi siya makakabigay ng tamang sagot, pero yun pala, siya ang puro tama ang sagot.

"So, ano talaga 'to, by chance at yung judgment mo nga sa mga tanong at isasagot ng mga tao."

Nakapag-pilot taping na raw sila ni Chris na ipapalabas nga sa Linggo, February 12.

Pang-apat na show raw niya ang Toink! sa kasalukuyan sa Kapatid network. Pero malapit na rin naman daw magtapos ang iba niyang shows tulad ng P.S. I Love You.

Biro tuloy namin sa kanya, parang bawal bumaba sa tatlo ang shows niya?

"Ay, hindi naman. Nasasakto lang na may mga shows na nag-i-start na hindi pa nag-e-end ang iba. So, nag-o-overlap.

"Pero ano lang, after, dalawa na lang ang show ko—Ang Juicy at ito. 

"Kasi, matatapos na po ang P.S. I Love You at ang Hey, Saberday."

Nakapag-game show na rin daw siya noon, ang Big Shot, Jackpot with Joey de Leon.

ON CHRIS TIU. Silang dalawa ni Chris, kumusta naman?

"Ay naku, okay naman si Chris Tiu.  Totoo ang mga tsismis na mabait siya at humble. May tsismis bang ganoon or ako lang ang nagtsi-tsismis?"

Parang kinikilig siya kay Chris. Sa Juicy kasi, madalas siyang niloloko sa cager-host.