Sa isang hindi inaasahang lugar at pambihirang pagkakataon ay nakapanayam ng PEP.ph (Philippine Entertainment Portal) ang aktres na si Snooky Serna.

Nakausap ng PEP si Snooky nang um-attend siya ng Grand Evangelical Mission ng Iglesia Ni Cristo (INC) noong Martes, February 28, sa Quirino Grandstand, Luneta Park. 

Pauwi na si Snooky at mga kasamang kaanib sa relihiyon, kabilang na ang co-manager na si Ka Mio Manansala.

Sa dami ng mga dumalong INC members at mga kasamang taga-iba ring relihiyon—an estimated 12 million katao mula sa iba't ibang dako o Church locales sa buong Pilipinas—ay nahirapang mag-park ng sasakyan sina Snooky at kanyang mga kasama.

Kinailangan pa raw nilang maglakad hanggang sa Malate area sa Maynila para sa kanilang pag-uwi.

A CHANGED WOMAN. Pero masaya si Snooky sa pagbabahagi sa PEP ng kanyang saloobin hinggil sa pagiging kaanib ng Iglesia Ni Cristo.

Aniya, hindi siya dumalo sa nasabing event para sa publicity.

"It's not because of that," bungad niya.

"Talagang nabago ako ng Ama at ang Ama ang tumawag sa akin, sa tulong ng mga Kapatid [sa INC]."

Kabilang daw si Snooky sa mga baptized INC member mula sa Paco, Manila. Kung minsa'y sumasamba rin siya sa Kapilya ng Syquia sa Sta. Ana, Manila, na malapit sa tinutuluyang condo unit ngayon ni Cookie (palayaw ni Snooky).

"Thank God! Ang daming pagbabago...

"Unang-una, binago sa akin ng Ama yung pagpapahalaga ko sa time.  

"Nagkaroon ako ng... how do you call that? Sense of responsibility. 

"And nag-mature ako, in spirit. Thank God!

"So everything just came into place.