Isang sorpresa sa karamihan ang pagdating ng Asia’s Songbird na si Regine Velasquez-Alcasid sa launching ng OPM2Go kagabi, March 28, sa Eastwood Citywalk.

Ang maybahay ng singer-songwriter na si Ogie Alcasid ay nagbigay-suporta sa kanyang mister at naghandog pa ng kanta sa mga dumalo sa naturang event.

Pagkatapos ng kanyang performance ay nakausap ng PEP.ph (Philippine Entertainment Portal) at iba pang media si Regine.

Ano ang masasabi niya na mayroon nang OPM2Go na ang layunin ay mapalawak ang local music industry o OPM?

“I’m very happy,” ngiti ng Asia’s Songbird.

“Actually, no’ng kinukuwento pa lang sa akin ito ng asawa ko, na-excite na ako agad, e.

“Kasi alam ko na kailangan natin ng ganito, e. Para mabuhay ulit ang ating industriya at saka para mas madali na makakuha ng mga songs.

“Kasi puwede sa phone lang, madaling mag-download, ang dali.”

SUPPORTIVE WIFE. Sa mga ganitong adhikain ni Ogie, sobra-sobrang suporta raw ang ibinibigay ni Regine sa kanyang mister.

Aniya, “Siyempre, ‘yon naman ang role ng asawa—suportahan yung mister.

“And I’m very, very proud of my husband, kasi ano niya ito, e, idea niya ito, e.

“At natutuwa ako na… it’s coming to life yung mga iniisip niya, nangyayari, natutuwa ako.

“'Tsaka ayun na nga, I’m very proud.

“We’re so blessed kasi mabait rin kasi siyang tao, kaya talagang bine-bless siya ni Lord.”

OGIE & EUGENE. May ginagawang musical film ngayon si Ogie, ang I Do Bidoo Bidoo, kung saan ang gaganap niyang asawa ay si Eugene Domingo.