Naging panauhin kamakailan sa DZBB 594 radio program ni German “Kuya Germs” Moreno ang Superstar na si Nora Aunor.

Sa panayam ni Kuya Germs kay Nora, inisa-isa niya ang mga proyekto at plano for this year.

IMMEDIATE PROJECTS. "Anu-ano nga ba ang aabangan ng mga tagahanga ni Nora ngayong taon?" tanong ni Kuya Germs kay Nora.

“Ni, [ang tawagan nina Kuya Germs at Nora sa isa’t isa] unang-una nilang aabangan yung ginagawa naming pelikula ni Direk Brillantes Mendoza ang Thy Womb na ang kabuuan ng pelikula ay kukunan sa Tawi-Tawi," sagot ng Superstar.

"Sinu-sino ang makakasama niya sa pelikula?" tanong ng Master Showman.

“Marami… nandIyan si Lovi Poe, Bimbo [Bembol] Rocco na nakasama sa pagbabalik-telebisyon ko at marami pang iba," sagot ni Ate Guy.

"Hindi ba nagkatambal na sila noon ni Bembol?"

Ani Ate Guy, “Opo Ni, sa Tatlong Taong Walang Diyos  at dun nga sa teleserye namin sa TV5."

"Bukod sa pelikula, meron din bang drama-teleserye na gagawin?" tanong ni Kuya Germs.

“Oo, pero Kuya, pelikula muna yung gusto kong  gawin," umpisa ni Nora.

“Kasi 'pag teleserye, yung oras mo talagang inu-umaga.

“Pahinga muna ako, magpapapayat muna ako kasi pansin na pansin nila yung pagdagdag ko ng timbang.

“Tsaka na lang ako ulit magte-teleserye.

“Mas gusto ko munang gumawa nang gumawa ng pelikula ngayong taon."

Bukod sa mga commitment ni Ate Guy sa ibang mga producer, mayroon ding plano si Kuya Germs at Ate Guy na gumawa ng isang project–Si Ate at si Kuya.