Two-year directing contract daw ang pinirmahan ni Eric Quizon sa TV5 noong Pebrero, at freelance siya pagdating sa pagiging aktor at host.

Kaya naman nagawan pa ng puwang ng actor/director/producer na maging co-host ni Atty. Lou Tancinco sa public-service program na Pusong Pinoy Sa Amerika.

Ang naturang show ay umeere sa GMA Pinoy TV, ang flagship international channel ng GMA Network, tuwing Linggo, 6:10 ng gabi (Philippine time).

Nakapanayam ng PEP.ph (Philippine Entertainment Portal) at iba pang entertainment press si Eric kahapon, Mayo 3, sa presscon ng Season 7 ng Pusong Pinoy Sa Amerika, na ginanap sa isang restaurant sa Tomas Morato, Quezon City.

PUSONG MAMON. Bukod sa paghu-host at pagdidirek ng ilang programa, abala rin si Eric sa sequel ng pelikulang Pusong Mamon.

Ito ang pelikulang pinagbidahan mismo ni Eric, kasama sina Albert Martinez at Lorna Tolentino, at idinirek ni Joel Lamangan noong 1998.

Ayon kay Eric"We’re on our third story revision, pangatlong revision na siya.

“Pero this time, mukhang okay na siya. We decided to go with simplicity… ‘yong simplicity no’ng original na Pusong Mamon.

“So, Viva decided na gusto nila na parang gano’n lang din ‘yong takbo ng istorya, ‘wag masyadong complicated, masaya lang siya.

“I think nga that’s the beauty of Pusong Mamon—very simple, heartwarming, and people can relate to it.

"So, gusto namin parang gano’n lang din siya.”

Matatandaang ang Pusong Mamon ay kuwento ng kakaibang pagsasama sa isang bubong ng dalawang bakla na magkarelasyon (Eric at Albert) at ang babaeng nabuntis (Lorna) ng isa sa kanila.

Ikinuwento naman ni Eric ang magiging pagbabago sa sequel ng nasabing pelikula.

“Kami pa rin tatlo, may mga twist lang,” pagtukoy niya sa mga kasama niya sa pelikula na sina Albert at Lorna.

“'Tapos siyempre may anak na kami ngayon, ‘yong anak ni Lorna ‘tsaka ni Albert lumaki na, tumanda na.

“Tapos mayro’n nang nagkakaroon ng girlfriends, so may mga gano’n—being a parent na ‘yong takbo ng istorya.

“Maganda na siya ngayon, so we’re supposed to do it in April pero na-move nga kami kasi nga ‘yong istorya.

“So, ngayon, we’re slated na ipalabas ang movie ng September, so dapat by July tapos kaming mag-shoot.”