Wala raw CCTV camera sa baggage area ng Ninoy Aquino International Airport (NAIA) Terminal 3, kung saan naganap ang insidente na kinasangkutan nina Raymart Santiago, Claudine Barretto, at Ramon Tulfo.

Ito ang sinabi ng isang may katungkulan na airport personnel sa Philippine Entertainment Portal (PEP.ph) kaninang tanghali, May 7.

Malinaw ding sinabi nito, na kung pagbabasehan ang sinabi ng kinapanayam niyang eyewitness, si Raymart umano ang unang nanakit.

Taliwas ito sa unang pahayag ng mag-asawang Raymart at Claudine Santiago sa Showbiz Central, kung saan umangal ang aktor na "Biglang sinuntok ako."

Sinabi naman ni Claudine sa nasabing Sunday showbiz talk show na bigla raw "nag-amok" si Ramon—na mas kilala bilang Mon—nung lumapit pa ang dalawang kaibigan ng mag-asawa.

(CLICK HERE for related article)

TULFO’S SIDE. Sa panayam ng PEP sa telepono kay Mon habang papunta ito sa studio ng TV5 kaninang alas tres ng hapon, nanindigan ito na "walang katotohanan" ang paratang nina Raymart at Claudine.

Ang panimulang kuwento ng broadcaster, “Kahapon, a, kagagaling ko lang sa Davao. Pagkatapos, e, nakita ko 'yong isang babae na hindi ko naman kilala, e. Hindi ko nakilala, e.

"Minumura 'yong flight stewardess ng Cebu Pacific, umaangal siya dahil nawalan siya ng bagahe, naiwan 'yong bagahe kung saan siya nangggaling.

“Nasa kanya ang simpatiya ko dahil napakawalang kuwenta ng Cebu Pacific sa pagha-handle o sa pag-iingat ng mga pasahero at ng mga bagahe, kaya nandoon 'yong simpatiya ko sa kanya.”

Pero ang simpatiya raw na ito ni Mon ay nawala nang nakita niyang hindi na tama ang pagtrato ng aktres sa ground stewardess.

Pagpapatuloy ng radio at print reporter: “Ngunit nang makita ko na personal na 'yong ginawa niya doon sa flight stewardess ay nagbago ang simpatiya ko... doon sa ground stewardess na, dahil pinepersonal na niya.

“Minumura na niya at sinasabi niya na ‘matatanggal ka sa trabaho,’ e, wala naman alam 'yong tao.

“Hindi naman niya kasalanan na naiwan 'yong kanyang bagahe, hindi naman kasalanan ng flight stewardess na naiwan 'yong bag ni Claudine sa Boracay. Sa Boracay siya galing, e.

“Kinunan ko ng mga litrato. Sinita ako ni Raymart.