Pagkatapos manalo ni Eugene Domingo ng awards for Best Actress sa iba’t ibang award-giving bodies dito sa Pilipinas, at tanghaling People’s Choice for Best Actress sa nakaraang Asian Film Awards, ang susunod na target pala niya ay ang hiranging Box-Office Queen.

“Opo, yun po ang pangarap ko.

“Ano lang… pinapalad lang na halos lahat ng pelikulang salihan ko ay kumikita. Pero hindi pa talaga to-the-max.

“Sana ay mabahaginan ako ni Ai-Ai [delas Alas] at saka ni Vice [Ganda], e.

“Gusto ko rin po yun. Maganda ring achievement yun as an actress.”

Ito ang inamin ni Uge, palayaw ni Eugene, nang makausap siya ng PEP.ph (Philippine Entertainment Portal) at iba pang media sa grand presscon ng pinagbibidahan niyang Kimmy Dora and The Temple of Kyeme sa ilalim ng Star Cinema at Spring Films.

Ginanap ang presscon kanina, May 28, sa Dolphy Theater sa loob ng ABS-CBN compound.

BEST SEQUEL. Posible namang makamit ni Eugene ang pangarap niyang ito kapag kumita ng malaki ang naturang sequel ng blockbuster hit movie niyang Kimmy Dora: Kambal sa Kyeme na ipinalabas noong 2009.

Nakatakda namang ipalabas sa mga sinehan ang Kimmy Dora and The Temple of Kyeme sa June 13. Parehong sa ilalim ito ng direksyon ni Joyce Bernal.

Ano ang masasabi ni Uge na malapit nang ipalabas ang sequel ng Kimmy Dora?

Paano niya maia-assure sa mga tao na maganda ang pelikulang ito bukod sa nag-shoot pa sila sa South Korea para kunan ang ilang mahahalagang eksena?

“Unang-una po, hindi namin inaasahan na magkakaroon kami ng sequel dahil tatlong taon na ang nakararaan.

“At saka parang puwede namang okay na yun, e, maganda na yun, e... point taken.

“Parang nakapag-set na tayo o puwedeng sabihin na gawa na lang tayo ng iba, parang ganun.

“Kaya lang po, kahit saang lugar po ako pumunta sa buong mundo, merong request, e, na, ‘Kailan po ba yung Kimmy Dora 2 o Kimmy Dora 3?’