Noong una ay hindi inakala ni JM de Guzman na magiging mainit ang pagtangkilik ng mga manonood sa unang proyekto sa telebisyon na kanyang pagbibidahan, ang Angelito: Batang Ama.

Kaya naman laking gulat din niya na magkakaroon pa ng ikalawang yugto ang programa, na katatapos lamang noong Abril.

“Actually, noong nag-start po ‘yong first Angelito, medyo mababa po ‘yong ano po namin, e.

“So, ine-enjoy na lang po namin, ‘tapos binigay po namin ang best namin.

"Nagulat na lang po kami na ito na po, kinagat po ng mga tao,” sabi ng 23-year-old actor nang makapanayam siya ng PEP.ph (Philippine Entertainment Portal) at iba pang media sa story conference ng Angelito: Ang Bagong Yugto.

Ito ay ginanap sa training room ng ELJ Building sa loob ng ABS-CBN compound sa Quezon City kahapon, Mayo 29.

Dahil sa bagong proyektong ito, walang humpay ang pasasalamat ng binatang aktor.

Aniya, “Thankful po ako sa mga sumuporta at nagmahal doon sa istorya.

“Sa akin po, sobrang grateful lang din po ako sa ABS-CBN for the trust na binigay sa akin.

"Ito kasi, paunti-unti kong nakukuha ‘yong dreams ko.”

Para kay JM, sobra pa ang biyayang tinatamasa niya ngayon sa kanyang showbiz career kumpara sa kanyang mga hiniling.

“Dati support roles lang, basta magka-regular soap lang ako, okay na,” sabi ni JM.

Dagdag pa niya, “Ewan ko. Parang nagpa-flashback lang ako na parang dati, masali lang ako sa Star Magic, okay na ako. ‘Tapos mabigyan lang ng supporting roles, okay na.”

Kaya naman kahit sunud-sunod ang trabaho, hindi magawang magreklamo ni JM.

Aminado siya na, “Noong unang feeling, parang gusto ko nang magreklamo kasi napapagod ako, nai-stress ako.”