Hindi man inamin nina Aljur Abrenica at Kylie Padilla ang tunay nilang relasyon, inamin naman nila ngayon na wala na sila.

Kinumpirma rin ito ng ilang taong malapit sa dalawang Kapuso starts.

Ayon sa reliable source ng PEP.ph (Philippine Entertainment Portal), hindi na raw nagkikita o nag-uusap ang dalawa.

Binabantayan na lang daw si Kylie para hindi na ito makipagkita kay Aljur.

Nang makausap ng PEP si Kylie, consistent pa rin ang pahayag nito na magkaibigan lang daw talaga sila ni Aljur.

Hindi na idinetalye ng young actress kung paano nila tinapos ni Aljur ang kung anong relasyon meron sila.

Sabi niya lang sa PEP, “Siyempre nag-usap. Maayos ang usapan, e, yun lang muna.

“Nagkausap naman minsan, pero hindi na masyado nagkikita.”

VACATION IN AUSTRALIA. Ngayong tapos na ang taping niya sa The Good Daughter, pinaghahandaan na lang daw ni Kylie ang kanyang bakasyon sa Australia.           

Baka magtagal daw siya roon ng halos isang buwan.

Pagbalik dito ay baka makasama raw niya ang mga kapatid niya at ang kanyang mommy na si Liezl Sicangco, para dito naman magbakasyon.

Pagbalik daw niya galing bakasyon ay gusto raw niyang mag-concentrate agad sa trabaho.

“Gusto ko isang matinding back to work na,” sabi ni Kylie.

Pagdating sa lovelife ay hindi na raw niya iniisip ito, pero nagpahayag ang dalaga na open siya sa mga gustong manligaw.

“Wala na po sa isip ko yun, e. I don’t know…” sandali siyang natahimik at hindi na nito itinuloy ang gusto niyang sabihin.