Hindi na raw alam ni Zsa Zsa Padilla kung paano pa siya magre-react sa muli na namang pagkalat sa text at social networking sites ng isyu tungkol sa diumano’y pagpanaw o di kaya’y paglala ng kundisyon ng kanyang partner at King of Comedy na si Dolphy.

“Oo nga, e. Sabi ko nga, ‘pag nakikita ba tayo sa ospital… nagpunta kasi ako sa ospital nung week na yun, e.

“’Tapos kinabukasan, may balita na. Pero may iba akong pasyenteng dinadalaw.

“Minsan, ganun nga, matatawa ka; minsan mapipikon ka. Parang depende na lang sa mood namin, e.

“Pero marami pa rin talaga ang concerned, marami pa ring nagtatanong.

“Hindi ko naman puwedeng i-address nang i-address yung ganun, di ba?” sabi ni Zsa Zsa.

Nakausap ng PEP.ph (Philippine Entertainment Portal) si Zsa Zsa nang bisitahin namin ang shooting ng kinabibilangan niyang pelikula, ang I Do Bidoo Bidoo: Heto nAPO Sila, noong Martes, May 29, sa Sampaguita Pictures compound sa Granada St., Quezon City.

Ang totoo raw ay stable naman ang kundisyon ni Dolphy ngayon. Gusto pa nga raw nitong mag-abroad.

Ayon kay Zsa Zsa, “Talagang gustung-gusto niyang mag-abroad. So, kung talagang mapapayagan siya ng doktor niya.

“Kaya lang since… lalo na ngayon ang panahon magulo—mainit ‘tapos biglang uulan, di ba? Ang daling magkasakit, e.

“Well, it’s not easy for him. He’s been fighting for his life for a couple of years na.

“Talagang bilib din ako sa kanya kasi talagang hindi siya nagrereklamo. Mabait siyang pasyente kasi, e.”

SIMPLE CELEBRATION. Nagdiwang si Zsa Zsa ng kanyang ika-48 kaarawan noong May 28.

Kumusta naman ang ginawa nilang selebrasyon?

“Wala, simpleng-simple. Hindi ko talaga hilig yung magpa-party, e,” sagot ng Divine Diva.