Naganap noong May 29 sa GMA Annex Building ang story conference para sa bagong teen-oriented series na Together Forever, kunsaan bida ang tambalan nina Julie Anne San Jose at Elmo Magalona.

Ang Together Forever ang papalit sa magpapaalam nang Reel Love Presents Tween Hearts, na napapanood tuwing Sunday afternoon pagkatapos ng Party Pilipinas.

Aminado sina Julie Anne at Elmo na nakakaramdam sila ng matinding kaba dahil ang programa nila ang papalit sa timeslot ng Tween Hearts, na almost two years namayagpag sa ere.

Ilang shows na ang nagtangkang tumapat sa Tween Hearts, pero napanatili nito ang mataas na ratings.

Sabi nga ni Julie Anne sa PEP.ph (Philippine Entertainment Portal), “Siyempre po, we feel nervous kasi nakasanayan na ng marami ang Tween Hearts every Sunday.

“I had the privilege to be a guest sa Tween Hearts at nakita ko how hard they work.

“I’m happy na kahit saglit lang, naranasan ko ang mapabilang sa Tween Hearts.

“Kaya sobrang challenge ito para sa amin ni Elmo. We want to give them a good show as well.

“Sana suportahan po nila itong Together Forever ‘tulad ng pagsuporta nila sa Tween Hearts para masaya tayong lahat.”

Para naman kay Elmo, ito na raw ang malaking test para sa team-up nila ni Julie Anne.

Napatunayan na nila ang galing nila sa pag-perform sa Party Pilipinas at nagkasama na rin sila sa iba’t ibang shows, ‘tulad ng Andres de Saya at Daldalita.

Saad ni Elmo, “Hindi pa po kasi tapos ang movie namin ni Julie na Just One Summer kaya sa Together Forever muna nila kami mapapanood talaga as a certified loveteam.

“Kahit naman po ako, nakapag-guest din ako sa Tween Hearts before and there’s really teamwork sa show na iyon kaya sila tumagal at nag-top sa ratings.

“We hope to have that same teamwork dito sa Together Forever.

“Kapag maganda kasi ang work environment, maganda ang magiging product ng trabaho namin.