Isa nang ganap na malaking artista si Eugene Domingo kung pagbabasehan ang hatak niya sa takilya.

Sa kasalukuyan nga ay humahataw sa takilya ang kanyang pinakabagong pelikula—ang Kimmy Dora and The Temple of Kiyeme.

Sa kasikatan niya, tiyak na didikit sa kanya ang mundo ng pulitika.

Pumasok ba sa isip niya na balang-araw ay pasukin ang mundong iyon at maging isang public servant?

Pahayag ni Uge, “Iyon din ang naiisip ko, kung bakit ang karamihan sa ating mga artista, lalo pa at yung ating mga sinasabing mga beterano, beterana, nauuwi sila sa public service.

“Hindi ka makakapagsalita ng tapos kasi baka talagang dumarating sa estado ng isang artista na napapalapit sa mga tao dahil ano natin ito, e, mundo natin ito, e.

“Talagang we try to please other people.

“Baka dadating din sa iyong consciousness na bukod sa pag e-entertain sa kanila, gusto mo din silang matulungan in all aspects, as much as you could.”

May nag-alok na ba sa kanya na tumakbo sa isang public position?

“Wala naman, wala.”

Wala rin daw pulitiko sa pamilya nila.

Pero hindi niya isinasara ang pintuan ng pagkakataon.

Saad ni Uge, “Wala naman tayong isinasarang door. Ako talaga, hindi ako mapagsara ng door.

“Ang sa akin, I just speak for today, I am thankful for yesterday and I’m very hopeful for tomorrow.”

Nakausap ng PEP.ph (Philippine Entertainment Portal) kagabi, June 17, Linggo, sa block screening ng Kimmy Dora and the Temple of Kiyeme sa Newport Cinema 2 ng Resorts World Manila.