Tuluy-tuloy ang pagtulong na ginagawa ni Aiza Seguerra para sa Protégé: The Battle For The Big Break grand winner na si Krizza Neri, kahit matagal nang tapos ang naturang talent search kung saan nagsama sila bilang mentor at protégé.

Si Aiza ang nag-produce ng self-titled debut album ni Krizza sa ilalim ng kanyang sariling label, ang Blackbird Music.

Nakausap ng PEP.ph (Philippine Entertainment Portal) at iba pang press si Aiza sa album launching ni Krizza na inorganisa ng GMA Artist Center kahapon, June 19, sa Whitehouse on the 84th restobar sa Scout Tuason, Quezon City.

Kaagad tinanong si Aiza kung bakit niya naisipang i-produce ng album si Krizza bilang first mainstream artist ng kanyang record label.

Sagot ni Aiza, “Oo nga, nagkataon. Hindi naman intensiyong siya yung maging first, nagkataon lang.

“Sa totoo lang, even before she won the contest, plano na namin talagang gumawa ng album kasi maganda talaga yung boses niya.

“Pero ang plano namin noon, talagang independent release, kaso nanalo.

“So, parang ang pangit naman na, di ba, nanalo siya ‘tapos hindi namin ipu-full blast.

“Kaya nagpapasalamat din ako sa Media Nation at sa GMA Artist Center para sa tulong at suporta. And sa Universal Records na magdi-distribute ng album.”

Bukod sa pagiging album producer, nag-contribute din ng dalawang original tracks si Aiza sa album at nakipag-duet pa kay Krizza.

“Yeah, I wrote two songs, pero lahat yun I co-wrote it with friends.

“The other one is ‘Look My Way,’ ang gumawa ng lyrics nun si Joel Trinidad and ako yung gumawa ng music.

“Yung isang song yung ‘Kung Malalaman Mo,’ ako naman yung gumawa ng lyrics and si Mr. Ryan Cayabyab yung gumawa ng music.

“May mga songs diyan na kasama dun sa contest, like yung ‘Narda,’ yung ‘Could Have Been,’ ‘tapos yung duet namin ng ‘If I Could’ and ‘Wind Beneath My Wings.’

“Thankful nga ako sa Star Records na pumayag para gawin ko yung duet, kasi under contract ako sa Star Records, e.”