May ilan pang impormasyong nakalap ang PEP.ph (Philippine Entertainment Portal) hinggil sa kasalukuyang kundisyon ng beteranong direktor, prodyuser, writer, at aktor na si Mario O'Hara na kasalukuyang naka-confine sa isang ospital sanhi ng isang malubhang karamdaman.

Acute leukemia ang na-diagnose na sakit ni Direk Mario nang ma-confine ito simula noong Biyernes, June 15.

Sa maikling panayam ng PEP sa nakababatang kapatid ni Direk Mario na si Jerry O'Hara kagabi, June 21, sa tahanan ng mga O'Hara sa Makati City ay napag-alaman ng PEP ang kundisyon ng direktor.

"Bumubuti naman ang kalagayan niya. Nagre-respond siya sa gamot, sa chemotherapy," bungad ni Jerry, na napapanood sa ABS-CBN series na Princess And I.

Ang ganitong lagay ni Mario ay nagsimula kahapon, June 21, matapos ang limang araw na confinement.

"Hanggang kahapon [June 20], kritikal siya," patuloy ni Jerry.

"Pero ngayon, mabuti naman. Yung white blood cells niya, bumaba [ang bilang] ng kalahati. Nag-respond ang katawan niya sa chemotherapy.

"Makulit na siya. Sana magpatuloy.

"Hinihintay namin, kahapon, hanggang ngayon... kasi baka magka-brain hemorrage, wala ka nang magagawa.

"Dalawang araw nang lumalaban yung katawan niya. 

"Kami ni Heber [O'Hara, pamangkin ni Mario], masayang-masaya kami!"

Kasama raw ni Jerry na salit-salitang nagbabantay kay Direk Mario ang pamangkin nilang si Janice O'Hara at ang personal na assistant ng direktor na si Alan Magbojos.

"Kailangan, merong isang puwedeng mag-decide if anything happens. Hindi puwedeng minor kasi nga it's a critical stage."

Gayunpaman, may positibong kaganapan, ayon kay Jerry.

"Sana magtuluy-tuloy. Kasi malakas ang katawan niya.