Ikinasal na sina Precious Lara Quigaman at Marco Alcaraz noong Linggo, July 8.

Ginanap ang “very private” na Christian wedding nina Lara at Marco sa Hacienda Isabella sa Carasuchi sa Indang, Cavite.

Alas-kuwatro ang nakalagay sa imbitasyon, pero dahil biglang bumuhos ang ulan, naantala ito ng halos isa’t kalahating oras.

THE WEDDING MARCH. Past 5 p.m. nang simulan ang wedding march ng bumubuo ng entourage.

At dahil mahilig mag-travel sina Marco at Lara, isang vintage travel ang tema ng kanilang kasal.

Sa venue ng kasal, isang footpath ang inilagay sa gitna ng swimming pool kung saan magmamartsa ang buong entourage.

Sa kabilang dulo ng pool, naghihitay sa couple ang magkakasal na si Pastor John V. Gay ng Without Walls Ministries.

Taliwas sa tradisyon na puti ang isinusuot ng bride, kulay beige ang kulay ng wedding gown ni Lara na gawa ni Veeday Floresca.

Lalong lumutang ang kagandahan at pagiging isang beauty queen ni Lara sa kanyang wedding gown.

Lalong tumingkad naman ang kaguwapuhan at kakisigan ng aktor sa kanyang suit na gawa ni Randy Ortiz.

Saksi sa pag-iisang dibdib ng dalawa ang ilang malalapit na kamag-anak at mga kaibigan.

Relax na relax lang si Marco habang naghihintay na simulan ang wedding ceremony. Pero bumigay na rin ang aktor at hindi na rin niya napigilang lumuha habang naglakakad patungong altar ang kanyang magandang bride.

Dahil ulila na sa ama si Lara, tanging ang mommy na lang niya ang naghatid sa kanya sa altar. Bakas din sa mukha ni Mrs. Princesita S. A. Quigaman ang lungkot, pero halatang natutuwa ito sa pagpapakasal ng anak.

Ang color motif na napili ng dalawa ay lavander, powder blue, at blush pink.

THE BIG REVEAL. Eksaktong alas-6:29 ng hapon nang magpalitan ng kani-kanilang personal vows sina Marco at Lara.