Ngayong halos sampung taon na sa showbiz si Erik Santos, marami ang nagtatanong kung ano pa ba ang magagawa niya sa industriya bukod sa pagkanta.

Dahil na rin nanggaling sila sa iisang talent show, ang Star In A Million ng ABS-CBN, madalas maikumpara si Erik sa kasabayang si Christian Bautista.

Nagbida na sa pag-arte si Christian sa pamamagitan ng Pan-Asian series na The Kitchen Musical, kung saan kasama niya si Karylle; napansin pa nga ito sa international scene.

Sa presscon para sa kanyang nalalapit na concert, na ginanap sa Kozui Green Tea sa Tomas Morato, Quezon City, nilinaw ni Erik na nais niyang patuloy na makilala bilang isang singer.

“Kasi ayokong masyadong… hindi kasi ako aktor…so… maybe I can act pero hindi talaga yun yung goal ko sa career ko.

“Ang goal ko kasi career ko, to be like Basil [Valdez], Gary [Valenciano], Martin [Nievera] na talagang nag-stick sila sa singing. Because that’s what they do best, e—singing.

“And feeling ko, yun yung strength ko—yung mag-offer nang mag-offer ng mga kanta, be it masaya or malungkot na kanta. Ayun yung direksiyon ng career ko.”

CHANGES IN HIS MUSIC. Kung mayroon man daw mga pagbabago sa kanya ay may kinalaman ito sa kanyang musika.

“Siguro, mas yung changes, sa music ko. Sa music.”

Nakilala man bilang Prince of Pop, sinusubukan na rin daw ni Erik ang iba pang mga genre upang may bagong abangan ang kanyang mga fans.

“Yeah, actually nag-e-explore kami ng mga bagong approach when it comes to... yung pagre-record ng mga bagong kanta.

“Pero ganun pa rin, ang core pa rin namin, ang main goal pa rin namin is mapalakas yung OPM [Original Pilipino Music].

"Pero yung genre, siyempre sinusubukan pa rin namin.

“Lalo kapag yung mga concerts. 'Yan kasi yung venue, yung perfect venue para mapakita mo yung versatility mo as a singer.

"Kasi sa album, hindi masayado, e.”