Malinaw na lumalala ang hidwaan sa pagitan ng talent manager na si Annabelle Rama, 59, at ng entertainment reporter na si Chito Alcid, 61.

Matatandaang nasangkot ang dalawa sa sandaling kaguluhan noong gabi ng Hulyo 13, ang ikatlong araw ng lamay para sa yumaong Comedy King Dolphy.

Nauna nang naiulat ng PEP.ph (Philippine Entertainment Portal) na nasaksihan ng naglalakihang mga artista sa burol ang paghahabulan ng dalawa sa loob ng isang dining hall ng Heritage Memorial Park and Crematorium sa Taguig City.

Ang nasabing silid ay isa sa mga hall na inokupa ng pamilya Quizon para sa mga nakikiramay sa kanilang patriarch at katabi lamang ng mismong pinaglalagakan ng labi ni Hari ng Komedya, na sumakabilang-buhay noong July 10, Martes.

Magkahiwalay na humingi ng paumanhin sina Annabelle at Chito sa pamilya ng pumanaw na batikang komedyante. Naging grasyoso naman ang pamilya ni Dolphy, na nagsabing maayos na sa kanila ang pangyayari "pero sana hindi nangyari roon."

Bagamat pinatawad na sila ng pamilya Quizon, hindi naman agad natuldukan ang alitan sa pagitan nilang dalawa.

Sa katunayan, maaaring mauwi na ito sa demandahan dahil nagbanta ang showbiz reporter na magsasampa ng kaso laban sa talent manager, matapos niyang ipa-blotter ang insidente sa Taguig police station kahapon, July 16.

Ayon sa ulat ng TV5 News, "frustrated homicide at libel" ang pinag-aaralang kaso ng kanyang kampo na isasampa laban kay Annabelle.

Samantala, sa ulat naman ng GMA News, nanindigan si Annabelle na hindi niya uurungan si Alcid.

Sabi ng talent manager at matriarch ng Gutierrez family: “Itutuloy ko pa rin ang demanda ko sa iyo at hindi ako magso-sorry sa iyo, no way.”

THE COMMOTION. Nangyari ang insidente sa pagitan nina Annabelle at Chito sa ikatlong gabi ng lamay ni Dolphy.

Noong gabing iyon, ang nakatokang hosts ng dinner ay mga artistang naging bahagi ng Sampaguita Pictures, na pagmamay-ari ng mga Vera Perez at kunsaan sumikat ang Comedy King.

Sa loob ng hall na pinangyarihan ng kaguluhan, may mga mahigit na sampung mesa, na maaaring magpaupo ng mga sampung katao bawat mesa.

May takip ang mga ito na puting table cloth, may puting table napkins, mga kubyertos, at flower arrangement sa gitna. Sa isang banda ng hall ay ang mahabang buffet table. Sa isang banda pa ay ang mga drinks.

Makikitang magkakasama sa isang mesa ang mag-asawang Annabelle Rama at Eddie Gutierrez, Susan Roces, Armida Siguion-Reyna, Dolor Guevarra, Marichu Vera Perez, at ilan pang bisita.

Sa kabilang banda, magkakasama naman sa isang mesa sina Chito Alcid, Amalia Fuentes, Daisy Romualdez, Azenith Briones, Ilocos Sur Governor Chavit Singson, at ilan pa.