Patuloy ang mataas na ratings at pangunguna sa primetime ng ABS-CBN drama series na Walang Hanggan.

Dahil dito, nagpapasalamat ang isa cast members ng teleserye na si Helen Gamboa, na gumaganap bilang ang kontrabidang si Donya Margaret.

Saad niya, “Siyempre ecstatic ako, elated, and of course, I give back also all the glory to God for putting this show.

“Kasi from the time they conceptualized this teleserye, hangga’t sa nabuo, kaming mga magkakasama—ako, si Susan [Roces], si Dawn [Zulueta], Richard [Gomez], si Coco [Martin], lahat... lahat ng mga kabataan—lahat kami parang nagkaisa na we will put or we will give our best para sa teleseryeng ito.

“Unang-una, napakaganda ng istorya. Pangalawa, siguro yung chemistry naming mga magkakasama.

“Tapos yung samahan na para talaga kaming tunay na pamilya.

“Yung pagtanggap ng tao sa teleserye namin has inspired me more to do my best.

“Kaya lahat kami, nagkaisa kami na mas pagbutihin namin yung pagganap namin para matuwa ang mga manonood."

Nakausap ng PEP.ph (Philippine Entertainment Portal) si Helen sa thanksgiving party ng Walang Hanggan noong Lunes ng gabi, July 16, sa The Gallery ng Richmonde Hotel sa Eastwood, Libis, Quezon City.

AUDIENCE ACCEPTANCE. Nagpapasalamat si Helen na bagamat kontrabida ang role niya sa Walang Hanggan ay tanggap at minamahal pa rin siya ng publiko.

Kuwento ng beteranang aktres, “When I go to the mall, wala nang tumatawag sa akin ng Helen, puro 'Donya Margaret' na.

“Ang ipinagpapasalamat ko, sabi ko nga, 'Pasensiya na kayo sa pagiging maldita ko sa Walang Hanggan.’

“Sabi nila, ‘Hindi, idol ka namin. We love you.’

"Sabi ko naman, ‘Ay, salamat.’

“Kasi baka mamaya may mambato sa akin, pero hindi naman siguro.

“Of course, our audience, ang mga kababayan natin, they’re all very intelligent, alam naman nila na teleserye lang ito.”