Nakapanayam ng PEP.ph (Philippine Entertainment Portal) at iba pang taga-media si Atty. Ray Espinosa, president at COO ng TV5, sa launching ng tatlong bagong shows ng Kapatid network kagabi, July 17.

Inilunsad sa Elements Tent Centris, Quezon City, ang TV5 shows na Third Eye, Enchanted Garden, at Artista Academy.

Sa nasabing panayam ay napag-usapan ang nababalitang merger o pagsasanib ng TV5 at GMA-7.

Isa sa nilinaw ng media kay Atty. Espinosa ay ang magiging katayuan ng Kapuso network sakaling mabili ng Kapatid network ang majority ng shares nito.

Ayon kay Atty. Espinosa, walang mababago sa GMA-7 sakaling matuloy ang merger.

“Hypothetically, pag nabili, ha,” sabi niya, na ang ibig sabihin ay wala siyang sinisigurado sa nasabing usapin.

“Nililiwanag ko lang!” pahabol pa niyang natatawa.

Sakaling matuloy ang merger, mag-iiba kaya ang mga tao o magpapatakbo ng GMA-7?

“Hindi naman necessarily mag-iiba ang tao, di ba? Kasi mahusay naman yung kumpanya na yun, e.

“Di ba, kung mahusay naman yung kumpanya, ba’t ka naman magpapapalit ng mga tao?”

SLOWLY MERGING IN? Matagal na ang usapin tungkol sa merger, at may mga nakakapansin na parang unti-unti ay nasa Kapatid network na ang ilang mga artista, direktor, at mga tauhan ng GMA-7.

“Ha, nandito na ba?” patanong na tugon ni Atty. Espinosa.

Ilan sa mga ibinigay na halimbawa ay ang direktor na si Joel Lamangan, ang aktor na si Eddie Garcia, at maging ang dating Kapuso network SVP for entertainment na si Ms. Wilma Galvante.

“Hindi, si Wilma naman nag-retire na siya sa…” putol na sabi ni Atty. Espinosa.

Bumalik ang tanong sa kung ano ang dahilan bakit parang natatagalan ang pagsasakatuparan ng balitang merger.