Nairaos nang matiwasay—in austere rites—ang opening ceremonies ng 8th Cinemalaya Philippine Independent Film Festival 2012 kagabi, July 20, sa Tanghalang Nicanor Abelardo ng Sentrong Pangkultura ng Pilipinas, Pasay City.

Ito'y sa kabila ng masungit na panahon at karaniwang buhul-buhol na traffic sa Kamaynilaan at karatig-pook, dahilan para marami sa mga invited guests ng annual independent cinema event ay hindi makadalo.  

Ngunit punung-puno pa rin ang Main Theater lobby ng CCP, sa pagbubukas ng palatuntunan. Kabilang sa mga CCP at Cinemalaya officials na naroon ay sina Dr. Raul M. Sunico, CCP President, Ms. Emily Abrera, member of the Board of Trustees, at Ms. Laurice Guillen, Cinemalaya Competitions Director.

Dumalo rin ang itinuturing na "Ama ng Cinemalaya" na si Mr. Antonio "Tonyboy" Cojuangco, kasama ang longtime actress-partner na si Gretchen Barretto.

Hindi nakasipot sa opening ceremonies sina Robbie Tan, Monitoring Head, at Nestor Jardin.  Ang bagong festival director na si Chris Millado ay nagpaabot ng mensahe sa pamamagitan ng maikling video.  

In-acknowledge din ang pagdalo ni Dr. Bienvenido Lumbera, National Artist for Literature.

Maraming mamamahayag at iba pang kinatawan ng local entertainment media (print and broadcast), kabilang ang PEP.ph (Philippine Entertainment Portal). 

Tampok ang grupong Sipat Lawin ensemble na nagpalabas ng "awards skit" featuring talents na naka-costume ng iba't ibang tauhang gumanap sa Cinemalaya at iba pang indie films.  

Kabilang din sa nag-perform ang ilang miyembro ng Tanghalang Pilipino Actors' Company katulad ni Sheenly Gener.

In a monologue, she reprised her role as Insiang, sa pagsasadula ng Tanghalang Pilipino in 2006.

Ang pinaka-highlight ng event kagabi ay ang pagpapalabas ng opening film na Babae sa Breakwater (2003) sa Main Theater, bilang natatanging pagpupugay o tribute sa yumaong aktor, manunulat at direktor na si Mario O'Hara.

Pinagkalooban ng Certificate of Recognition si O'Hara, sa pamamagitan nina Laurice Guillen at CCP President Dr. Sunico. Ang kinatawan ng pamilya O'Hara, na tumanggap ng parangal, ay si Heber O'Hara, pamangkin ng yumaong direktor.

Kabilang sa pamilya O'Hara na namataan ng PEP.ph sa CCP event ay sina: Peewee O'Hara, stage-TV-movie actress and professor, Heber, Emmanuel Espejo Jr. at Paolo O'Hara, mga pamangkin ng yumao.  

Naroon din si Alan Magbojos, ang matapat na PA (personal assistant) ni Direk Mario; at ang actor-friend ng pamilya, si Lance Raymundo.

Pumanaw si Mario O'Hara noong June 26, 2012 sanhi ng sakit na leukemia. Siya ay 66 na taong gulang.