Ipinalabas kahapon, Sabado, July 21 sa Paparazzi Showbiz Exposed ang kuwento ng komedyanteng si Sammy Lagmay na nakaratay ngayon sa banig ng karamdaman.

Kuwento ng kapatid nitong si Mylene, “Sa ngayon po, hindi talaga maganda ang kalagayan niya dahil inuubo siya ngayon. Kagabi hindi siya makatulog sa sobrang ubo niya kaya sobrang hirap siya ngayon, hirap huminga. Hinihingal daw siya.”

Ilang linggo na daw nasa ospital si Sammy dahil sa sakit na diabetes na napag-alamang dalawang taon na pala niyang dinadala.

Pahayag ni Sammy sa Paparazzi, “Kahit nung may show pa ako sa Channel 5, may sakit na ako. Kaya lang, pinipilit pa ring magtrabaho kasi kailangang kumita, e. Dumating sa puntong nawala na yung show, medyo bumigay na rin ang katawan.”

Kasalukuyang nag-da-dialysis si Sammy. Dugtong pa na kuwento ng kanyang kapatid na si Mylene, “Nag-umpisa lang yan sa pagka-diabetic niya. Tapos hanggang sa naano na yung ibang organs niya tulad ng kidney niya, tapos yung baga niya may tubig na.”

Bukod sa sakit na diabetes, may isa pang nararamdamang sakit si Sammy—ang unti-unting paglabo ng kanyang paningin.

Lahad ni Mylene, “Isa na naman dun sa problema namin yung mata niya kasi bulag na nga po siya. Inaano namin na baka pwede naming ipatingin. Baka pwede pa siyang makakita ulit.”

Emosyonal namang kuwento ni Sammy, “Talagang di ko kayang mag-isa na. Kung maglalakad ako, talagang matitisod ako. So I’m considering myself na medyo bulag na rin kasi talagang hindi ko na nakikita, e.”

Naibenta na halos lahat ni Sammy ang kanyang mga naipundar, ayon pa sa kuwento ng Paparazzi. Bagamat may mga nagpaabot ng tulong na mga kasamahan noon sa showbiz ay kapos pa rin daw talaga sila para sa iba pang mga gastusin lalo na sa mga gamot. Kaya naman nananawagan si Sammy ng kaunting tulong mula sa mga dating kasamahan at kaibigan.

Lambing pa niya, “Ako’y nananawagan sa inyo na sana’y makahingi po ng konting tulong sa inyo. Talagang hirap na hirap na. Kung may makatulong, salamat. Yung mga kasamahan ko sa trabaho, sana makatulong kayo.”