Hindi nakadalo si Zsa Zsa Padilla at ang anak nitong si Zia Quizon sa party na inihanda ni Willie Revillame para sa kaarawan ni Dolphy kagabi, July 25, sa kanyang Wil’s Place sa Sgt. Esguerra St., Quezon City.

Kahapon sana ang 84th birthday ng Comedy King, na yumao noong July 10.

Kahit sa Heritage Memorial Park and Crematorium, kung saan inabangan din siya ng media, ay hindi rin nakasipot si Zsa Zsa. May sakit daw ito.

Kuwento ni Eric Quizon sa PEP.ph (Philippine Entertainment Portal), namamanhid ang kaliwang binti ni Zsa Zsa at nagka-cramps daw ang tiyan nito.

Si Zia naman ay nagkaroon ng flu pagkatapos ng family outing nila sa Laguna.

Bago ang dinner na inihanda ni Willie, nagkaroon muna ng Misa na dinaluhan ng mga anak ng Comedy King, sa pangunguna nina Eric Quizon, Vandolph, Epi, Rolly, at Nicole.

Dumalo rin ang ilang malalapit na kaibigan ng pamilya, gaya ng talent managers na sina Dolor Guevarra, June Torrejon, at Lolit Solis, ang entertainment editor na si Ricky Lo, at si Manay Ichu Maceda.

Natuwa ang mga anak ng Comedy King dahil alam daw nilang masaya ang kanilang ama sa pag-alala sa kanyang kaarawan, lalo na’t maraming pagkaing inihanda.

Bale iyon daw kasi ang bonding nilang mag-anak noong nabubuhay pa si Dolphy—ang kumain nang kumain.

ERIC QUIZON. Isa nga raw ito sa nami-miss ni Eric dahil madalas niyang nakakasama ang kanyang ama sa kainan, gaya ng lunch, dinner, at kahit merienda.

“Anything that reminds me of him, naaalala ko siya.

“Like I said, pag kumakain kami, that’s our bonding moment, e.

“So, pagka kumakain, bigla ko siyang naaalala. Yung mga paborito niyang pagkain.

“Yung kapag nakikita ko ang mukha niya pag kumakain siya, yung mga ganung moments,” pahayag ni Eric.

Pati sa panaginip ay pagkain pa rin daw ang alaala niya sa kanyang ama.