December last year nang unang aminin ni Jericho Rosales na isang half-British half-Filipino ang kanyang bagong girlfriend, na hindi pa niya pinangalanan noon.

Pebrero naman nang unti-unti siyang nagbigay ng clue tungkol sa identity nito.

"I'll give you a little clue. She's in the business din, but not an artista.

“[She's] 24 years old.”

"Host siya sa ETC, ng isang fashion lifestyle show called Etcetera,” paglalahad ni Echo noon.

Kahit pa giveaway na ang clue na ito, hindi pa rin binabanggit ni Jericho ang pangalan ng kasintahan, hanggang noong March 4, sa interview niya sa The Buzz.

Dito na niya opisyal na ipinakilala si Kim Jones, isang Half-British Pinay na lumaki sa Australia.

Unang nakitang magkasama sa publiko sina Jericho at Kim noong March 14 sa MYX Music Awards na ginanap sa Music Museum.

Nakita rin sila sa lamay para kay Dolphy, ang yumaong King of Comedy.

Sa ekslusibong panayam naman ng PEP.ph kay Jericho kahapon, July 28, tinanong namin kung gaano katagal na ang relasyon nila.

Si Kim ang tinanong ni Echo, “Babe, how long have we been together?"

Tapos, pagbaling ni Echo sa amin, sabi nito, “Almost a year now. One year na.” 

“No!” angal ni Kim, dahil hindi pa raw sila umaabot ng isang taon.

Paliwanag naman ni Echo, “We’ve known each other for more than a year. October, last year.”

Oktubre 2011 nga raw noong, officially, pumasok sila ni Kim into a relationship.