DIFFERENT FEELING FOR BABY GIRL. Masaya naman si Chris sa pagkakaroon ng anak na babae. Ibang-iba raw pala ang pakiramdam na may baby girl.

Meron na kasi silang dalawang anak na lalaki, sina Paolo, 13, at Quirsten, 9.

Sabi ni Chris, “I never thought it’s gonna be this good.

“Sabi ko nga kay Shey, yung dalawa kong anak, mahal ko sila. Even noong baby pa sila, mahal ko.

“Pero ito [Eia], iba ang attachment ko sa kanya. Ewan ko kung bakit, hindi ko talaga alam. Hindi ko rin alam kung dahil babae lang.

“Hindi nga kami makabiyahe.

“Two weeks ago, booked kami for Hongkong. Pero sabi ko kay Shey, huwag na lang tayong umalis. 

“Nag-U.S. kami nung February. So, nagpakabit ako ng CCTV [Closed-Circuit Television camera] sa bahay para makikita namin siya anywhere.

“Parang ang hirap umalis. Unlike before, kapag gusto naming umalis, aalis lang kami.

“Sasabihin namin sa dalawa [Paolo at Quirsten], ‘Let’s go!’ Sila na ang magpa-pack. Pero ngayon, iba, e,” pahayag ni Chris.

GETTING READY FOR THEIR WEDDING. Ngunit kahit daw nandiyan na si Eia, para kay Chris, si Sherilyn pa rin ang pinaka-priority niya.

“Siya pa rin…siya pa rin,” aniya.

Kung hindi man in-charge si Chris sa first birthday party ng anak na babae, siya naman ang in-charge sa church wedding preparation nila ni Sherilyn sa December.

Civil wedding kasi ang nangyari sa kanila nung 2003.

Hindi rin agad sila nakapagpakasal, dahil bago sila nagkakilala ay pareho silang kasal sa ibang tao.