Namataan ng PEP ang magkaibigang Pops Fernandez at Aiko Melendez sa gala premiere ng Cinemalaya entry na Sta. Niña sa Cultural Center of the Philippines noong July 24.

Bagamat pinagkaguluhan ang magkaibigan ng mga nakapilang manonood ng pelikula, napagbigyan pa rin nila ng maiksing interview ang ilang media, kasama na ang PEP.ph (Philippine Entertainment Portal).

Naroon daw sila para suportahan ang entries ng Cinemalaya, kabilang na ang pelikulang pinagbibidahan ni Coco Martin.

Sabi pa ni Pops, “First time kung makapanood sa Cinemalaya, kaya nae-excite ako.”

Balak din ba nilang gumawa ng indie movie in the future?

"We’re planning. Siguro, I’ll be part of it. She’s my line producer,” sagot ni Aiko, sabay turo kay Pops.

Sabi pa ni Aiko, suspense-drama ang nais nilang gawing pelikula kapag maayos na ang lahat.

Kaya naman daw nagpapapayat na talaga ang mother of three para sa gagawing movie.

“Nagpapapayat talaga ako, kasi gagawa ako ng movie ulit. May new soap din, so I have to get back in shape again,” sabi ng magaling na aktres.

Si Pops naman ay hindi gaanong aktibo ngayon sa kanyang singing career dahil mas pinagtutuunan nito ng pansin ang kanyang production outfit.

Kamakailan nga lamang ay nag-produce sila ng celebrity golf tournament for a cause.

Ibig bang sabihin nito ay pinaninindigan na niya ang kanyang pagiging producer?

“Trying, tingnan natin,” sagot ng tinaguriang Concert Queen.

LOVELIFE. Inusisa ng PEP kay Aiko ang napapabalitang may bago raw siyang dini-date ngayon.

“Si Pops ang bago kong lovelife—she should know!” natatawang sabi ni Aiko.