Bahagi na lang ngayon ng nakaraan ng TV host na si Andrei Felix ang masalimuot na kinahinatnan ng relasyon nila noon ng artistang si Jennylyn Mercado.

Kung si Jennylyn ay nakahanap na ng bagong pag-ibig sa katauhan ng TV host/actor na si Luis Manzano, si Andrei naman ay masaya na rin sa piling ng kanyang bagong kasintahan, ang beauty queen na si Venus Raj.

Nagsimula bilang magkatrabaho sina Andrei at Venus sa daily morning program ng ABS-CBN na Umagang Kay Ganda (UKG).

Nauwi ito sa pagkakaibigan, at ngayon ay bukas na sa publiko ang kanilang relasyon bilang magkasintahan.

PUBLIC DISPLAY OF AFFECTION. Ngunit ang isang isyung ipinupukol kina Andrei at Venus ngayon ay ang pagiging sobra raw nilang pagpi-PDA, o public display of affection.

Marami raw tao ang naiilang kapag nakikitang sobrang naglalambingan ang magkasintahan.

Ano ang masasabi ni Andrei rito?

“Narinig ko na din ‘yan pero wala naman kaming ginagawang hindi normal. 

“Ginawa namin sa GGV [Gandang Gabi Vice] yung tarsier jump, pero hindi naman namin palaging ginagawa yun kahit saan. 

“Sabi ko nga sa kanya, it’s also normal for people to think that  dahil, before, when I was single, I used to think that same way towards other couple.

“Naiintindihan ko na ngayon. Hindi maiiwasan yun, you cannot please everybody,” saad ng TV host sa panayam sa kanya ng PEP.ph (Philippine Entertainment Portal).

ADVANTAGES AND DISADVANTAGES. Kasalukuyang magkasama sa Umagang Kay Ganda sina Andrei at Venus.

Hindi ba mahirap sa parte ni Andrei na kasama niya sa trabaho ang kasintahan, lalo na’t hindi maiiwasang minsan ay may tampuhan sila na maaaring makaapekto sa trabaho nila?

“Ang advantages and disadvantages… pag in sync kami, in sync talaga kami. Pero pag may tampuhan, hindi maiiwasan na di kami maapektuhan. 

“Napag-usapan na namin yun from the very beginning, dapat hindi maaapektuhan ang trabaho namin, dahil bago naman naging kami, pareho na kaming nandito sa industriya, sa UKG.”

Hanggang ngayon ay hindi pa rin makapaniwala si Andrei na nauwi sa relasyon ang pagiging magkatrabaho at magkaibigan nila ni Venus.