Hindi raw ikinadismaya ni Rhian Ramos kung hindi man natuloy ang dapat sana ay pagsasama nilang tatlo nina Aljur Abrenica at Kris Bernal sa isang soap opera. 

Pero aminado ang Kapuso actress na excited sana siya para rito.

“I was excited talaga sana to work with them,” sabi ni Rhian nang makakuwentuhan ng PEP.ph (Philippine Entertainment Portal) pagkatapos ng Party Pilipinas kahapon, Linggo, August 19.   

“Pero alam kong… kung feeling ng station [GMA-7] na ano… mas may magandang story, papalitan nila. 

“So I don’t feel bad naman na pinalitan nila. 

“In fact, kung feeling nila na hindi magwu-work, thankful ako na pinalitan nila. 

“Imbes na itinuloy namin na baka hindi ano… di ba?”

Sa halip na ang proyekto na kasama si Rhian ang gagawin nila, nagdesisyon ang management ng Kapuso network na sina Aljur at Kris ang magbida sa Pinoy remake ng hit Koreanovela na Coffee Prince.

Si Rhian naman ay isa sa magiging leading ladies ni Senator Bong Revilla sa telemovie na Indio. 

Paglalarawan ni Rhian sa kanyang bagong proyekto: “Isa siyang epic na fantaserye. Pinaghalong action, fantasy, at saka love story. 

“Sa pagkakaalam ko sa role ko, isa akong diwata. 

“Pero so far, wala pa akong natatanggap na script.

“And, well, siyempre senator si Bong Revilla, so marami rin siyang ibang kailangang gawin. 

“So dahil do’n, may mga parts ng show na talagang ika-can namin.

“So sisimulan namin siya hopefully this September o kaya October. Pero eere pa siya next year.”