Marami ang natuwa at kinilig sa duet nina Sarah Geronimo at Gerald Anderson sa 25th anniversary ng Cebuana Lhuillier noong Martes, August 28, sa Smart-Araneta Coliseum.

Magkahawak-kamay sila habang nagdu-duet at kapansin-pansin din ang sweetness nila.

Pagkatapos ng duet nila ng “Won’t Last a Day Without You,” bumalik si Gerald sa stage sa kantiyaw ni Sarah para sa isa pang kanta.

Pagkatapos nito ay inawit ng young actor ang “We’ve Got Tonight” na ikinakilig ng kanilang mga tagahanga.

Lalo pang kinilig ang fans nang tanungin ni Sarah si Gerald kung "single" pa ito.

Isang matamis na ngiti lang ang isinagot dito ng young actor.

Ganun pa man, sapat na ito upang maghiyawan ang fans ng dalawa.

Dahil din dito, lumakas ang paniniwala ng marami na nagkaayos na muli ang kanilang mga idolo matapos mapabalitang tumigil na sa panliligaw si Gerald kay Sarah.

Ngunit may usap-usapan din na nagdesisyon na lang silang itago ang kanilang relasyon para makaiwas sa mga intriga.

Pero may naniniwala ring bahagi lamang ito ng palabas para pakiligin ang mga nanood ng nasabing pagtatanghal.

HAPPY SARAH. Ganun pa man, masaya raw si Sarah sa muli nilang pagkikita ni Gerald.

“Happy! Every time na nagkikita kami, natutuwa talaga ako… masaya,” sabi ng Pop Princess nang makausap ng PEP.ph (Philippine Entertainment Portal) pagkatapos ng show.

Aminado rin ang 24-year-old singer-actress na ine-enjoy niya talaga ang bawat pagkakataon na nagkakasama silang dalawa ni Gerald.

Kuwento pa ni Sarah, siya ang nagpilit kay Gerald na kantahin nang live ang “We’ve Got Tonight.”