Medyo malusog pa ang sexy comedienne na si Janna Dominguez nang dumalo siya sa presscon ng Pepito Manaloto, Ang Tunay na Kuwento, kagabi, September 4, sa Executive Lounge ng GMA Network Center.

Pagkatapos niyang manganak, apat na buwan na ang nakararaan, ngayon lang siya nagpakita sa press.

Nagsalita na rin si Janna tungkol sa kanyang pagbubuntis sa isang malusog na baby girl, na unang baby nila ng boyfriend niyang si Mickey Ablan.

Mas pinili raw ni Janna na manahimik nung buntis siya dahil gusto raw niya ng stress-free na pagbubuntis at maiwas sa mga intriga.

“Nahiya nga ako sa Startalk saka Showbiz Central, kasi kinukuha nila ang panig ko, kasi ayaw ko na lang talaga magsalita,” sabi nito.

Kainitan pa noon ng isyu ni Mickey at ng dati nitong karelasyon na si Iwa Moto nang nabuntis si Janna, kaya mas mabuting manahimik na raw muna siya para na rin sa kanyang kalagayan.

NOT THE RIGHT TIME. Pero ngayon ay maayos na raw silang lahat, at kahit si Iwa nga ay nagsalita na rin noon na mas gusto niyang maging magkaibigan na silang tatlo nina Janna at Mickey.

Pero ayon kay Janna, “Hindi pa kami nagkikita nang personal. Siguro kasi hindi pa panahon.

“Siguro mas maganda yung ready na ang lahat. Mas mature na lahat ng tao, mas naintindihan na yung bawat nangyayari.

“Hindi na yung parang high school na ganun. Hindi na ganun, di ba?

“Iba na ngayon, e. May anak na ako.

"Siya, I hope masaya na rin siya.

“So, siguro in time,” seryosong sabi ng dating Pinoy Fear Factor participantes sa posibilidad na pagkakaayos nila ni Iwa.

Ang boyfriend ngayon ni Iwa ay si Pampi Lacson, anak ni Senator Panfilo Lacson at estranged husband ng aktres na si Jodi Sta. Maria.