Abot-tenga ang ngiti nina John Lloyd Cruz at Bea Alonzo nang lumabas sa Cinema 10 ng SM Megamall kagabi, Setyembre 11, matapos panoorin ang unang screening ng The Mistress.

Sa ilalim ng direksyon ni Olivia Lamasan, ang The Mistress ay nagmamarka ng ika-sampung anibersaryo nina John Lloyd at Bea bilang isang loveteam.

Nakatrabaho ng dalawang Star Magic talents sa proyektong ito ang mga batikang aktor na sina Ronaldo Valdez, Hilda Koronel, Carmi Martin, at Anita Linda.

Paglabas ng sinehan, sinalubong ng mga katrabaho, fans, at ng media sina John Lloyd at Bea.

Sa panayam ng PEP.ph (Philippine Entertainment Portal), kasama ang ilang miyembro ng press, sinabi ng dalawang Kapamilya stars na masaya sila sa kinalabasan ng pelikula.

“Maniniwala ba kayo na sa pelikulang ito pinakamaganda si Bea?” panimulang sabi ni John Lloyd.

Nangingiti namang wika ni Bea, “Wow!” Sabay puri rin sa kapareha, “Napaka-hot lang ni John Lloyd!”

Nang banggitin ang isang eksena sa pelikula kung saan topless at naka-shorts lamang si John Lloyd, napabulalas si Bea ng: “Alam niyo ‘yan!”

Nagbiro naman si John Lloyd, “Akala ko nga daddy ko yun, e!”

MATURE SCENES. Mapapansin sa The Mistress ang ilang mature at sensual na eksena sa pagitan nina John Lloyd at Bea.

Wika ni Bea ukol dito, “Intense scenes!”

Bagamat hindi ganoon karami ang mga ito, sinabi ng aktres na naging importante ang mga ito sa takbo ng istorya.

“May mga sexual tension… yung mga intense scenes, wala kami yung mga scenes na sobrang kalma lang.

“Laging may ganun. Kailangan.”

Komento naman ni John Lloyd, “Kaya nga, e. Kaya mahirap , e.”

Parehong sumang-ayon sina John Lloyd at Bea na isa ito sa pinakamahirap na ginawa nilang proyekto.