Ang Babaeng Hinugot Sa Aking Tadyang ang ikatlong television series na pinagbibidahan ng love team nina Marian and Dingdong matapos ang Marimar at Dyesebel.

Ang karakter ni Marian, si Proserfina, ay natatakot na mahalin si Homer (Dingdong) dahil ang lahat ng lalakeng minahal niya ay napapahamak.

May isang mundo na lulong sa kamunduhan, ambisyon at kapangyarihan. Kung saan ang lahat ay may kani-kaniyang kasalanan. 

Dito isinilang si Proserfina, may tapang na hindi pangkaraniwan sa isang babae, may alindog na makapagpapa-ibig ng kahit sinong lalaki. Dumating siya sa walang kabuhay-buhay na mundo ni Homer at naghatid ng panganib at isang kakaibang kabog sa dibdib nito.  

Ngayon, susuungin ni Homer ang mundo ni Proserfina upang maipaglaban ang babaeng yumanig at lubusan bumago sa kaniyang mundo. 

Sa orihinal na likhang ito ni Carlo J. Caparas, pag-ibig kaya ang papawi sa kasalanan at hahaplos sa pusong inangkin ng kasamaan? 

Sa nakaraang press conference ng ABHSAT, ginawa muli nina Dingdong Dantes at Marian Rivera ang eksena kung saan biglaang nakitulog sa kama ni Homer si Proserfina.

Nang nagising ang nahihimbing na lalaki, kinuha naman ni Proserfina ang saxophone na siyang tinutugtog ni Homer.

Ang saxophone kasi ang tanging instrumento na pwedeng gamitin ni Homer, ayon sa bilin ng kanyang ina (ginagampanan ni Carmi Martin).

Ayon kay Marian, isang challenge para sa kanya ang gumanap ng isang daring character tulad ni Proserfina.

"Bukod sa medyo sexy siya, misteryosa kasi ang character ko dito, e," aniya. "Minsan sumusulpot ako, nawawala ako, makikitulog ako sa kabilang bahay, yung gano'n. Parang hindi mo alam kung sino talaga siya o kung ano yung pagkatao niya. Nakakatuwa na ang daling mag-shift ng character ni Proserfina. Magulo yung utak niya sa mga pangyayari."

Si Mart Escudero (kaliwa) ay ang kapatid ni Marian samatalang si Paolo Contis (kanan) ay isang lalaki na obsessed kay Proserfina.

Si Marian Rivera ay gumaganap bilang si Proserfina, ang misteryosang dalagang bigla na lamang dumating sa buhay ni Homer. May pambihira siyang alindog at madilim na nakaraan. Ipapakita niya kay Homer ang buhay na kailanma'y hindi pa nito nararanasan.  

Sa ABHSAT, first time ito ni Marian Rivera na magsuot ng two-piece swimsuit na walang tapis. Noon kasi sa Marimar ay naglagay siya ng robe sa eksena nila ni Katrina Halili.

Pumayag din daw ulit si Marian na mag-topless sa isang eksena nila ni Dingdong sa swimming pool. Pero nagawa na rin naman daw niya ito sa Dyesebel, kung saan gumanap siya bilang sirena.

Si Dingdong Dantes ay gumaganap bilang Homer, ang young executive na nasanay sa de-numerong pamumuhay. Bagama't nasunod lahat ng luho at nakatakda nang ikasal ay nadarama niyang sadyang kulang pa rin sa kanyang buhay. Magbabago ang lahat ng ito sa umagang paggising niya ay may napakagandang babaeng natutulog sa kaniyang tabi. 

May pagka-O.C. (obsessive-compulsive) at boring ang halos successful career man na si Homer, na siyang gagampanan ni Dingdong sa Ang Babaeng Hinugot sa Aking Tadyang.

Si Angelu de Leon bilang si Heleen, anak mayaman na pabagsak na ang kabuhayan. Ibig maikasal kay Homer para lamang hindi siya tuluyang maghirap.

Carmi Martin bilang si Hera ang relihiyosang ina ni Homer na gumagawa ng desisyon para sa anak, pati na ang pagpili ng mapapangasawa nito.

Si Jackie Rice bilang Cassandra, ang nakababatang kapatid ni Homer na piniling mag-asawa ng dukha kaya itinakwil ng ina. 

Si Prince Stefan ay si Aristotle na nakabababatang kapatid ni Homer na magpapari upang tuparin ang utos ng relihiyosang ina ngunit iibig sa isang dalaga. 

Si Paolo Contis ang magbibigay-buhay kay Rado, ang kriminal na haling na haling kay Proserfina. Dahil laging bigo na mapaibig ito, gagawin ang lahat, kahit gumamit ng dahas, maangkin lang ang dalaga.

Ngayong Lunes, February 2, magkakatapat ang teleserye nina Marian at Dingdong, ang ABHSAT sa GMA-7, at ang ABS-CBN teleserye nina Kim Chiu, Gerald Anderson at Jake Cuenca--ang Tayong Dalawa.

Si Mart Escudero ang bubuhay sa katauhan ni Ulysses, ang nakababatang kapatid ni Proserfina na nalulong sa droga. Malalagay ang buhay sa panganib kung kaya't ililigtas ng kapatid. 

Si Eugene Domingo ay ang madaldal na mayordoma na si Madel. Siya ang namamahala sa  mansion ng mga Alcaraz. Matagal nang naglilingkod sa kanila kaya parang anak na ang turing niya kay Homer. 

Si Alyssa Alano, gaganap na Citas, ang mali-mali at accident-prone na alalay ni Madel (Eugene Domingo). Laging up-to-date sa tsismis. 

Si Carlene Aguilar ay gaganap bilang si Clarisse, ang best friend ni Heleen (Angelu de Leon) na kasabwat nito sa kaniyang mga plano.  

Lovi Poe bilang si Athena, simple at magandang mang-aawit sa simbahan. Makikilala at mapupusuan ni Aristotle (Prince Stefan). 

Francine Prieto, gaganap sa katauhan ni Shiela, ang babae ni Rado (Paolo Contis) na mahal na mahal sya. Handang gawin ang lahat para sa lalaking iniibig--kahit pa ang pumatay.

Si Paolo Paraiso ay gaganap bilang Mike, ang best friend ni Homer na kaniyang napagsasabihan ng lahat ng kaniyang mga sikreto. 

Sherilyn Reyes bilang Tia Galatea, ang kiming kapatid ni Hera na sunud-sunuran sa kaniya. Ang takbuhan ng magkakapatid na Homer, Cassandra at Aristotle.

Kevin Santos as Jason, kaibigan ni Aristotle na umiibig din sa babaeng iniibig nito. 

Si Boom Labrusca ay si Greg, ang kalaguyo ni Heleen (Angelu de Leon). Playboy, at takot matali sa iisang babae. 

Ayon kay Direk Carlo J. Caparas, hindi siya papayag na maging last project na nina Marian ar Dingdong ang Ang Babaeng Hinugot Sa Aking Tadyang. Masasayang daw ang napakalakas na chemistry ng dalawa. In fact, may naisip na siyang project para sa dalawa.

"Nabili na ng GMA-7 ang rights ng Somewhere na sa pelikula'y pinagtambalan nina Lorna Tolentino at Rudy Fernandez. Bagay na bagay kina Marian at Dingdong yun, maganda ang istorya at para sa kanila yun."