Sa isang pambihirang pagkakataon ay magkakatrabaho ang magkapatid na Mark Gil (kaliwa) at Michael de Mesa (kanan) sa seryeng Valiente.

Gaganap sila bilang sina Armando Braganza (Mark Gil) at Damian Valiente (Michael de Mesa), ang mga tauhan na magsisimula ng kwento ng pamilya Braganza at pamilya Valiente.

Ang papel na Armando Braganza ay gagampanan ni Mark Gil.

Siya ang mabait at maawain na may-ari ng Villa Braganza. Napalalago niya ang kanilang hacienda sa tulong na rin ng kanyang matalik na kaibigang si Damian Valiente (Michael de Mesa), na isang magsasaka.

Mapapangasawa ni Armando si Trining (Jaclyn Jose), at magbubunga ang kanilang pagmamahalan ng tatlong anak—Theo (Oyo Sotto), Maila (Nadine Samonte), at Leona (Niña Jose).

Gaganap na mabait at masipag na Damian Valiente si Michael de Mesa.

Siya ang magsasaka na matalik na kaibigan ni Armando Braganza (Mark Gil), na siya ring may-ari ng pinasasakahang lupa ni Damian.

Ang asawa ni Damian ay si Luming (Gina Alajar), at magkakaroon sila ng isang anak, si Gardo (JC de Vera).

Tulad nina Armando at Damian, magiging matalik na magkaibigan ang kanilang mga anak na lalaki—sina Gardo at Theo (Oyo).

Pero ang pagpanaw ni Armando ay lubos na makakaapekto sa mga binata.

Ang malupit at makasariling si Donya Trining ay gagampanan ni Jaclyn Jose.

Siya ang asawa ni Armando Braganza at ina nina Theo (Oyo), Maila (Nadine) at Leona (Niña).

Matapos pumanaw ng kanyang asawa'y pamumunuan na ni Donya Trining ang Hacienda Braganza, habang unti-unti niyang binabago ang kanyang mga anak upang maging malupit at makasarili, tulad niya.

Ang maling paghubog niya sa kanyang mga anak ang magiging dahilan upang magkalayo ang loob nila Theo at Gardo (JC), na tulad ng kanilang mga ama'y dating matalik na magkaibigan.

Sina JC de Vera (kaliwa) at Oyo Sotto (kanan) ang magbibigay-buhay sa mga karakter nina Gardo Valiente at Theo Braganza.

Sina Gardo (JC) at Theo (Oyo) ay matalik na magkaibigan simula pa noong mga bata sila. Sabay nilang natutunan ang mga bagay-bagay sa hacienda, na itinuro ng kanilang mga ama na sina Damian (Michael) at Armando (Mark).

Mangyayaring magkakalayo ang dalawa at magkakaroon ng magkaibang prinsipyo sa buhay.

Si Theo, na gagampanan ni Oyo Sotto, ay ang panganay na anak nina Armando (Mark Gil) at Donya Trining (Jaclyn Jose), at kapatid nina Maila (Nadine Samonte), at Leona (Niña Jose).

Isang responsible at mabuting anak, kapatid, at kaibigan si Theo. Ngunit, matapos pumanaw ng kanyang ama'y huhubugin siya sa maling paraan ng kanyang ina, at tulad nito'y magiging malupit at mapagmataas.

Si Maila, ang mabait at maunawaing anak nina Donya Trining (Jaclyn) at Armando (Mark), ay gagampanan ni Nadine Samonte.

Simula pagkabata ay malapit na ang loob ni Maila kay Gardo, ang matalik na kaibigan ng kuya niyang si Theo. Ang pagiging malapit nila kalauna'y hahantong sa pag-iibigang wagas.

"Hindi naman talaga siya masama, isang babae lang siyang na-in love," ganito ang paglalarawan ni Niña Jose sa kanyang karakter na si Leona.

Si Leona ay anak din nina Donya Trining (Jaclyn) at Armando (Mark).

Kaiba kay Maila, sunod sa layaw si Leona, at katulad ng kanyang ina'y makasarili at pilit kukunin ang anuman niyang naisin.

Ang anak nina Damian (Michael) at Luming (Gina) ay si Gardo, na gagampanan ni JC de Vera.

Isang masipag at mabuting anak, tutulong ito sa kanyang ama sa pagsasaka sa Hacienda Braganza, na pag-aari ni Armando (Mark), ang matalik na kaibigan ng kanyang ama.

Matalik na kaibigan ni Gardo si Theo (Oyo), ngunit dahil sa unti-unting pagbabago sa ugali ng huli'y magkakalayo sila ng loob.

Ang batikang aktor na si John Regala ay kasama rin sa serye bilang Peping.

Si Peping ang katuwang ni Donya Trining (Jaclyn) sa pagsagawa ng masasamang plano laban sa pamilya Valiente.

Ang freelance child actress na si Liane Valentino ay gaganap na batang Maila, ang anak nina Trining (Jaclyn) at Armando (Mark) at kapatid nila Theo (Arvic Tan at Oyo Sotto) at Leona (Czarina Suzara at Niña Jose).

Unang nakilala si Liane sa children's show ng GMA-7 na Tropang Potchi.

Si Czarina Suzara naman ang gaganap na batang Leona, anak din nina Trining (Jaclyn) at Armando (Mark) at kapatid nila Maila (Liane Velentino at Nadine Samonte) at Theo (Arvic Tan at Oyo Sotto).

Si Czarina ay isang commercial model, at unang napanood sa TV5 teen-oriented show na Lipgloss.

Si Arvic Tan ay ang gaganap na batang Theo, panganay na kapatid nina Maila (Liane Velentino at Nadine Samonte) at Leona (Czarina Suzara at Niña Jose), at nag-iisang anak na lalaki nina Trining (Jaclyn) at Armando (Mark).

Si Arvic ay isang commercial model, mang-aawit, at mapapanood din sa GMA-7 late-night show na Walang Tulugan With The Master Showman.

Si Ross Pesigan naman ang gaganap na batang Gardo, ang anak nina Luming (Gina) at Damian (Michael).

Si Ross ay isang theater performer mula sa Dulaang U.P., at ngayon pa lang sasabak sa pag-arte sa harap ng kamera.

Ang remake ng Valiente ay nasa ilalim ng direktor na si Joel Lamangan. "Malapit sa puso" raw ng veteran director ang proyektong ito dahil isa siyang taga-subaybay noon ng orihinal na Valiente.

Ang mga aktor at aktres na magbibigay-buhay sa mga tauhan ng palabas na Valiente: (mula kaliwa, pinakataas) JC de Vera, Nadine Samonte, Oyo Sotto; (gitnang linya) Mark Gil, Jaclyn Jose, Michael de Mesa; (pinakababa) Tony Mabesa, Liane Valentino, Ross Pesingan, Arvic Tan, Czarina Suzara, at Jim Pebanco.

Ang Valiente ay magsisimula na sa Pebrero 13, sa primetime block ng TV5.

Si Mr. Tony Tuviera—na siya ring prodyuser ng Eat Bulaga!, ang blocktimer sa noontime slot sa GMA-7—ang prodyuser ng action seryeng ito.