Ang tambalang Louise delos Reyes (kaliwa) at Alden Richards (kanan) ang bida sa pinakabagong drama series ng Kapuso network.

Ito ang pang-anim na proyekto na pinagsamahan ng kanilang love team. Nauna ang Alakdana (2011), Tween Hearts (2011), Tween Academy: Class of 2012 (2011), The Road (2011), at My Beloved (2012).

Gaganap si Alden Richards bilang Tisoy, ang anak nina Carlos (Raymond Bagatsing) at Ellen (Jean Garcia). Sanggol pa lamang siya'y ipagpapalit siya ni Leila (Agot Isidro), ang asawa ni Carlos, sa isang batang babae, kaya mawawalay si Tisoy sa kanyang ina.

Aampunin siya ni Lola Tilda (Caridad Sanchez) at palalakihin siyang tunay niyang apo.

Iibig si Tisoy kay Elize (Louise delos Reyes), ang inaakala ni Carlos (Raymon Bagatsing) na anak niya kay Ellen (Jean Garcia).

Tututol si Carlos at asawa niyang si Leila (Agot Isidro) sa pagmamahalan ng dalawa, habang si Ellen naman ay susuportahan si Tisoy bilang paghihiganti kay Carlos.

Ang karakter ni Elize ang bibigyang buhay ni Louise delos Reyes. Siya'y inampon nina Carlos (Raymond Bagatsing) at Leila (Agot Isidro). Ito'y sa pag-aakala ni Carlos na si Elize ang anak niya kay Ellen (Jean Garcia).

Lalaking may marangyang buhay si Elize. Bagamat puno ng pagmamahal mula sa kanyang ama, sabik siya sa pagmamahal ng isang ina.

Ang hinahanap-hanap na pagmamahal na ito ni Elize ay makikita niya kay Tisoy (Alden Richards), na isang trabahador sa pier.

Ngunit ang pag-iibigan nila'y hahadlangan ng kanyang amang si Carlos (Raymond Bagatsing) at kinikilalang ina na si Leila (Agot Isidro). Pero makakahanap sila ng kakampi sa katauhan ni Ellen (Jean Garcia) na siya palang tunay na ina ni Tisoy.

Ang ambisyosong si Carlos ang gagampanan ni Raymond Bagatsing. Bagamat kasal na siya kay Leila (Agot Isidro), makikipagrelasyon ito kay Ellen (Jean Garcia) upang siya'y magkaanak.

Ang dalagang lubos na umibig kay Carlos (Raymond Bagatsing) ang magiging karakter ni Jean Garcia na si Ellen.

Magkakaanak sila at doon niya madidiskubre na kasal na pala si Carlos kay Leila (Agot Isidro). Sanggol pa lang ang kanyang anak ay mawawalay na siya dito, bilang paghihiganti ni Leila sa kanya.

Ang bagong Kapuso actress na si Agot Isidro ang gaganap bilang si Leila. Siya ang asawa ni Carlos (Raymond Bagatsing) na handang isuko at ibigay ang lahat para sa kanyang asawa.

Ngunit nang malaman niyang nagtataksil ito'y gaganti siya—ipagpapalit niya ang anak na lalaki ni Carlos kay Ellen (Jean Garcia) sa isang batang babae pagkasilang pa lamang nito. Tutulungan siya ng kaibigan niyang doktora na si Candice (Carlene Aguilar).

Si Candice, ang doktorang kaibigan ni Leila (Agot Isidro), ang magiging karakter ni Carlene Aguilar.

Tutulungan niya si Leila na ipagpalit ang anak na lalaki ni Ellen (Jean Garcia) at Carlos (Raymond Bagatsing) sa batang babae na ipinanganak din nang araw na iyon.

Si Bembol Roco ay gaganap bilang si Mayor Henry Sandoval ang ama ni Troy (Lucho Ayala), at ang mapapangasawa ni Ellen (Jean Garcia) nang makalaya siya mula sa bilangguan.

Kanyang tutulungan ang kabiyak na maghiganti sa pamilya ni Carlos (Raymond Bagatsing).

Ang anak ni Mayor Henry Sandoval (Bembol Roco), at mayamang manliligaw ni Elize (Louise delos Reyes) na si Troy ang gagampanan ni Lucho Ayala.

Ang buong cast ng One True Love: (Kanan-Kaliwa) Benji Paras, Winwyn Marquez, Agot Isidro, Andoy Ranay (direktor), Jean Garcia, Alden Richards, Louise delos Reyes, Raymond Bagatsing, Carlene Aguilar, Lucho Ayala at Bembol Roco.

Abangan ang pagsisimula ng pinakabagong primetime drama series na One True Love sa Lunes, June 11, pagkatapos ng Makapiling Kang Muli, sa GMA Telebabad.