Si Elisa, na gagampanan ni Jennylyn Mercado, ang gaganap bilang anak ni Maita (Glydel Mercado) sa kanyang pagkadalaga.

Nasabik si Elisa nang malamang magkakaroon na siya ng kapatid, na anak ni Maita sa nobyong si Bernard (Lloyd Samartino.

Pero hindi tanggap ni Bernard si Elisa, na ipinakilala ni Maita ilang linggo bago ang kanilang kasal.

Dahil sa isang aksidente ay manganganib ang buhay ni Elisa, at gagamitin ito ni Bernard upang matuloy ang kasal niya kay Maita at iwan nito si Elisa.

Lalaki si Elisa na may puot sa kanyang ina at magiging kapatid. Iisipin niyang iniwan siya ni Maita para sa ipinagbubuntis nito.

Lumaki siya na walang mga magulang kaya takot at hindi marunong magmahal si Elisa.

Ngunit ito'y mababago sa pagdating ni Andrew (Sid Lucero) na noong una'y kinaiinisan ni Elisa dahil sa madalas na pang-iinis ng binata.

Ang pilyo ngunit mabait na si Andrew ang magiging karakter ni Sid Lucero. Siya'y anak ng abugado na kaibigan ng pamilya Montenegro.

Una'y hindi sila magiging magkasundo ni Elisa (Jennylyn), na magiging yaya ng mentally challenged na anak nina Maita (Glydel) at Bernard (Lloyd) na si Angelica (Krystal Reyes).

Ngunit unti-unti ay mahuhulog ang loob niya sa dalaga, at tutulungan ito na buksan muli ang puso sa pag-ibig.

Bibigyang buhay ni Frank Magalona ang karakter ni Mark, ang matalik na kaibigan ni Elisa (Jennylyn) na laki rin sa hirap.

Siya ang nakakaalam ng mga hirap at problemang pinagdadaanan ni Elisa.

Ang pagiging matatag at pagkakaroon ng mabuting puso ni Elisa ang dahilan upang mahulog ang loob sa kanya ni Mark.

Si Angelica, gagampanan ni Kyrstal Reyes, ang batang ipinagbubuntis ni Maita bago niya iwan si Elisa (Jennylyn).

Magiging yaya niya si Elisa, na hindi niya alam ay ang nakatatandang kapatid pala niya sa ina.

Bagamat noong una'y malayo ang loob niya sa nakatatandang kapatid, unti-unti'y mapapamahal na sila sa isa't isa at poprotektahan na siya ni Elisa sa mga nais mang-api sa kanya.

Ang tutor ni Angelica (Krystal) na si Dennis ang magiging karakter ni Carl Guevarra.

Magkakagusto siya kay Celine (Saab Magalona), na anak ni Jordana at apo ni Doña Asuncion.

Gayunman, hindi siya papansinin ng dalaga dahil may gusto ito kay Andrew (Sid).

Ang mapagmahal at nagsakripisyong ina na si Maita ang karakter ni Glydel Mercado.

Pinili niyang mawalay sa anak na si Elisa (Jennylyn) at magpakasal kay Bernard (Lloyd), upang mailigtas ito sa bingit ng kamatayan matapos ang aksidenteng nangyari sa anak.

Ang paboritong anak ni Doña Asuncion na si Bernard ang karakter ni Lloyd Samaritano.

Asawa niya si Maita (Glydel), na ilang linggo bago ang kanilang kasal ay ipinakilala ang anak nito sa pagkadalaga, si Elisa (Jennylyn).

Hindi niya ito tanggap.

Kaya nang maaksidente ito at kinailangan operahan, hihingin niya kay Maita na pakasalan siya kapalit ng pagsagot niya sa pagpapa-opera at iba pang pangangailangan sa ospital ng anak nito.

Ang karakter na si Jordana ang bibigyang buhay ni Angelu de Leon.

Inggit siya sa kanyang kapatid na si Bernard (Lloyd) dahil siya ang paborito ng kanyang ina na si Doña Asuncion.

Kaya naman, gagawin niya ang lahat maging miserable lamang ang buhay ng kapatid.

Anak niya si Celine (Saab Magalona) at gagawing miserable ng mag-ina ang buhay ng magkapatid na Elisa (Jennylyn) at Angelica (Krystal).

Si Doña Asuncion, ang karakter ni Liza Lorena, ay ang ina nina Bernard (Lloyd) at Jordana (Angelu).

Paborito niya ang anak na si Bernard, kaya naman kahit anong pagpapasikat ni Jordana ay hindi niya ito binibigyang halaga. Ito ang magiging dahilan upang magkalayo ang loob ng magkapatid.

Ang karakter ni Saab Magalona ay si Celine, ang anak ni Jordana.

Katulad ng kanyang ina'y inggit si Celine sa kanyang pinsan na si Angelica (Krystal) dahil sa mas paborito ito ng kanyang lola na si Doña Asuncion (Liza), kahit pa mentally challenged ito.

Magkakagusto sa kanya ang tutor ni Angelica na si Dennis (Carl), ngunit hindi siya papansinin nito dahil may gusto siya kay Andrew (Sid).

Pero si Andrew ay iibig kay Elisa (Jennlyn), kaya naman gagawin niyang miserable ang buhay ng dalaga.

Ang komedyanteng si Mosang ay gaganap na kontrabida sa bagong programang ito ng GMA-7.

Siya'y si Betty, ang aampon kay Elisa (Jennylyn) matapos siyang iwanan ng inang si Maita (Glydel).

Aapihin niya si Elisa at palaging susumbatan sa pagpapatira niya dito sa kanilang bahay.

Si Joey Paras ay si Mimi, ang kaibigan nina Elisa (Jennylyn) at Mark (Frank).

Siya ang may alam tungkol sa lihim na pagtingin ni Mark kay Elisa.

Ang mga kabilang sa bagong soap ng GMA-7: (L-R) Mosang, Lloyd Samaritano, Carl Guevarra, Krystal Reyes, Direk Gil Tejada Jr., Jennylyn Mercado, Angelu de Leon, Frank Magalona, Saab Magalona, at Joey Paras.

Magagawa bang mapatawad ni Elisa (Jennylyn) ang kanyang ina na si Maita (Glydel) matapos siyang iwan nito?

Ano ang kayang ibigay ni Elisa mapasaya at maprotektahan lamang ang nakababatang kapatid na si Angelica (Krystal)?

Abangan ang kasagutan sa pagsisimula ng Hindi Ka Na Mag-Iisa sa Hulyo 9, pagkatapos ng Eat Bulaga! sa Afternoon Prime ng GMA-7.