Larawan ng isang masayang pamilya sina Chris, Sherilyn, at Baby Eia. Ayon kay Chris, talagang espesyal sa kanilang mag-asawa si Eia.

"Ewan ko ba, parang iba talaga iyong attachment, e. Siguro dahil babae siya at saka bunso," sabi ni Chris sa panayam sa kanya ng PEP. May dalawa pang anak na lalaki sina Chris at Sherilyn—sina Paolo at Quirsten.

Si Eia ang itinuturing na prinsesa ng pamilya. Kuwento ni Chris, maging ang mga anak nilang lalake ay very protective sa kanilang bunso. "Si Paolo, halos ayaw padapuan iyan. Minsan nga nakakahiya sa mall pag may lumalapit, tapos 'Ay, ang cute ng baby,' tapos hahawakan sa pisngi. Ayaw niyang pahawakan. Sasabihin niya, 'No.' Ako naman parang, 'Sobra naman, huwag naman gano'n.' 'E, hindi natin kilala 'yon, e.' May point naman siya pero ang sa 'kin, parang over lang."

Dumating din ang Azkals football player na si Phil Younghusband (kaliwa), isa sa mga ninong ni Eia. Kasamang dumalo ni Phil ang bunsong kapatid na si Keri, 10 (wala sa larawan). Bagamat halos may jetlag pa mula sa kanyang biyahe galing London, sinikap ni Phil na makadalo sa party upang bumawi sa pagiging absent nito sa binyag ni Eia noong nakaraang taon.

Naroon din ang aktres na si Sunshine Cruz (third from right), isa sa malalapit na kaibigan ni Sherilyn sa showbiz. Kasama niya ang tatlong anak nila ng aktor na si Cesar Montano, sina (L-R) Chesca, Angelica, at Sam.

Kasama rin ang aktres na si Valerie Concepcion ang anak niyang si Fiona. Si Valerie ay naging kaibigan ni Sherilyn noong nasa GMA-7 pa ito.

Naki-party din ang Kapuso actress na si Ayen Laurel at anak na si Angia, ang nag-iisang anak niya sa asawang aktor na si Franco Laurel. May dalawa pang anak si Ayen—sina Mariella at Kiko, sa dating asawang si Prince Jeffrey ng Brunei.

Naroon din si Christopher Roxas kasama ang mga anak nila ni Gladys Reyes.

Habang kinukunan ang litratong ito ni Aquisha—ang ikalawa sa tatlong goodlooking na mga anak nina Christopher at Gladys—ay masaya namang nag-ikot sa party venue ang panganay na si Christophe at bunsong si Grant Carlin.

Kuwento ni Sherilyn, napili nila ang Hello Kitty na theme para sa party dahil buntis pa lamang siya kay Eia ay nasimulan na niyang mangolekta ng mga Hello Kitty items.

"Nag-start iyan kasi may fan na taga-Japan na nagpadala sa akin ng isang box na puro Hello Kitty. Mga damit at mga gamit for Eia na hanggang four years old ,meron siya. So, doon nag-start. Kaya sabi ko, since gusto ko rin naman si Hello Kitty, e, Hello Kitty theme na lang." 

Dalawang function rooms ang inokupahan ng party. Ang isang kuwarto ay ginamit para sa mga activity booth, gaya ng Pinkbox mobile hair and nail salon, kung saan puwedeng magpaayos ng buhok at magpa-manicure ang mga bisita.

Ang booth ay regalo ni Carmina Villarroel, isa sa mga ninang ni Eia.

Mayroon ding pagawaan ng personalized bracelets para sa mga bisita. Hindi ito pinalampas ni Phil Younghusband, na nagpagawa ng bracelet para sa girlfriend na si Angel Locsin.

(Top) Mayroon ding food booths sa venue gaya ng waffle, fishballs, at cotton candy carts, at ang Pinkberry yoghurt stand na ito na special request umano ni Chris.

(Middle) Ang isa pang function room na ginamit para sa party ay nagsilbing dining at party area para sa mga bata. Siyempre, Hello Kitty pa rin ang disenyo ng stage backdrop.

(Bottom) Nagkaroon din ng palaro sa party at ilan sa mga papremyo ay ang mga cartoon items gaya ng mugs at lunch boxes.

(Left) Ang loot boxes na ito ay nakalaan para sa lahat ng batang bisita—mayroong para sa babae (pulang kahon) at para sa lalake (asul na kahon).

(Kanan) Siyempre, Hello Kitty din ang design ng birthday cake ni Eia. Gawa ito ng sikat na chef na si Heny Sison at niregalo kay Eia ng Drypers.

Espesyal naman ang regalo ng mga kuya ni Eia para sa kanya. Naghandog ng hip hop/dubstep medley sina Quirsten (kaliwa) at Paoie na ikinatuwa ng mga bisita. Hindi malayong magkaroon din ng magandang career sa showbiz ang dalawa dahil sa husay nila sa pagsasayaw. Ang dalawa ay anak ni Sherilyn kay Jun Santiago, kapatid nina Rowell, Randy at Raymart.